ދުނިޔޭގެ ސިއްޙަތު ޖަމިއްޔާގެ މެމްބަރުކަން ފަލަސްޠީނަށް ދީ އެޖަމިއްޔާގައި ފަލަސްޠީނުގެ ދައުރު ފުޅާކުރުމަށް ދިން ފުރުޞަތަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ.

އެމަނިކުފާނު ކުރެއްވި އެކްސްގައި ކުރެއްވި ޕޯސްޓްގައި ވިދާޅުވީ، ދުނިޔޭގެ ސިއްޙަތު ޖަމްޢިއްޔާގެ މެންބަރުކަން ފަލަސްޠީނަށްދީ އެ ޤައުމުގެ ޙައްގުތައް ކަށަވަރުކުރުމަށް ދެއްވި ފުރުޞަތަށް ރާއްޖެއިން މަރުޙަބާ ކިޔާކަމަށާއި، އެ ޙައްޤު ފަލަސްޠީނަށް ހޯަދައިދިނުމަށް ރާއްޖެއިންވެސް މަސައްކަތް ކޮށްފައިވާ ކަމަށެވެ. މިގޮތުން ޑަބްލިޔުއެޗްއޯގެ މެމްބަރެއްގެ ގޮތުގައި ފަލަސްޠީނު ހަމަޖެއްސުމަށް 77 ވަނަ ވޯލްޑް އެސެމްބްލީގައި ވޮޓު ދިން 101 ޤައުމުގެ ތެރޭގައި ރާއްޖެވެސް ހިމެނޭކަން އެމަނިކުފާނު ފާހަގަކުރެއްވިއެވެ. މީގެއިތުރުން ރައީސުލްޖުމްހޫރިއްޔާ ވިދާޅުވީ، މިކަމަކީ ފަލަސްޠީނަކީ ފުރިހަމަ ދައުލަތެއްގެ ގޮތުގައި ދުނިޔޭގެ ޤައުމުތަކުން ބަލައިގަތުން އިތުރުވަމުން އަންނަކަން ދަލީލުކޮށްދޭ ކަމެއް ކަމަށެވެ. އަދި އެ ނިންމުމަކީ، ހަމަޖެހުން ޤާއިމް ކުރުމަށް އެޅުނު މުހިއްމު ފިޔަވަޅެއްގެ ގޮތުގައި ވެސް ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.

ޑަބުލިޔުއެޗްއޯގެ މެމްބަރުކަން ފަލަސްޠީނަށް ދިންނަމަވެސް އަދި އެޤައުމަށް އެޖަމިއްޔާގެ ފުރިހަމަ މެމްބަރެއްގެ ގޮތުގައި، ވޯޓުގައި ބައިވެރިއެއް ނުވެވޭނެއެވެ.

07 އޮކްޓޫބަރު 2023 އިން ފެށިގެން ފަލަސްޠީނުގެ ރައްޔިތުންނާއި ދެކޮޅަށް އިޒްރާއީލުން ހިންގަމުން އަންނަ އުދުވާންތަކާއި ގުޅިގެން، ފަލަސްޠީނަކީ މިނިވަން ވަކި ދައުލަތެއްގެ ގޮތުގައި ހަމަޖެއްސުމަށް ގޮވާލާ އަދި އެކަމަށް ތާއީދު ކުރާ ޤައުމުތައް އަންނަނީ އިތުރުވަމުންނެވެ. ދިވެހިރާއްޖެއަކީ، ފަލަސްޠީނުގެ ދައުލަތް ޤަބޫލުކޮށް އަދި ފަލަސްޠީނުގެ ދައުލަތުގެ ވެރިރަށަކީ އިރުމަތީ ޤުދުސްކަމުގައި ކަނޑައެޅުމަށް އެންމެ ބޮޑަށް ވަކާލާތު ކުރަމުން އަންނަ އެއް ޤައުމެވެ.