ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުން ކުރަމުން ދިޔަ އިމާރާތަށް ކުރިމިނަލް ކޯޓުގެ ބައެއް ސެކްޝަންތައް ވަގުތީ ގޮތުން ބަދަލުކޮށްފިއެވެ.

ކްރިމިނަލް ކޯޓުން ވިދާާޅުވީ، ހުޅުމާލެ ފޭސް 1 ގައި، ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުން ކުރަމުން ދިޔަ އިމާރާތަށް، މާދަމާއިން ފެށިގެން 6 ސެކްޝަނެއްގެ މަސައްކަތް ބަދަލުކޮށްފައިވާ ކަމަށެވެ. މިގޮތުން، އެ އިމާރާތުގައި ހުރި ޝަރީޢަތްކުރާ 03 މާލަމުގައި، ކްރިމިނަލް ކޯޓުގެ B2, B3, B5, B8, B10 އަދި B11 މި 06 ސެކްޝަންގެ އަޑުއެހުންތައް ބޭއްވޭނެ އިންތިޒާމުތައް މިހާރު ވަނީ ހަމަޖައްސާފައި ކަމަށެވެ. އަދި މި އިންތިޒާމުތައް ހަމަޖެއްސުމަށް މަސައްކަތްކޮށްދެއްވި ހުރިހާ ފަރާތްތަކަށް އެކޯޓުން ވަނީ ޝުކުރު އަދާކުރައްވާފައެވެ.

ކްރިމިނަލް ކޯޓުން ވިދާޅުވީ، 22 ފެބުރުވަރީ 2023 ގައި ކޯޓުގެ އިމާރާތުން ބައެއް ބޭނުންނުކުރަން ޖޭއެސްސީ އިން އެންގުމާއި ގުޅިގެން، އަދި އޭގެ ފަހުން ކޯޓުގެ އިމާރާތަށް ފެން ފައިބާ ކަރަންޓު ނިޒާމަށް ގެއްލުން ވުމުގެ ސަބަބުން، ކޯޓުގެ ޝަރީޢަތްތައް ކުރިއަށް ގެންގޮސްފައި ވަނީ 1 ޝަރީޢަތްކުރާ މާލަމުގައި ކަމަށެވެ. އެހެެންނަމަވެސް ވަގުތީ ގޮތުން މިގެނެވުނު ބަދަލާއި ގުޅިގެން ކޯޓުގެ ބައެއް ސެކްޝަންތައް ހުޅުމާލެއަށް ބަދަލުކުރުމުން، މާލޭގައި ހުރި ކޯޓުގެ އިމާރާތުން ޝަރީޢަތްކުރާ 03 މާލަން ހުސްކުރެވިފައި ވާކަމަށާއި، އެހެންކަމުން، މިވަގުތު ހުޅުމާލެ މާލަންތަކާއެކު ޖުމްލަ 6 މާލަން ޝަރީއަތްކުރުމަށް ބޭނުން ކުރެވޭނެ ކަމުގައިވެސް އެ ކޯޓުން ވިދާޅުވިއެވެ.

އަދި މި 6 މާލަން 11 ޤާޟީންގެ މެދުގައި އެކިދުވަސްތަކަށް ބަހާލައިގެން ޝަރީޢަތްތައް ކުރިއަށް ގެންދިއުމަށް ހަމަޖެހިފައިވާއިރު، ދުވަސްވީ މައްސަލަތަކާއި ޝަރީޢަތް ނިމެންދެން ބަންދުގައި ތިބި މީހުންގެ މައްސަލަތަކުގެ ޝަރީޢަތްތައް ކުރިއަށް ގެންދިއުމަށް އިސްކަންދޭން ނިންމާފައިވާކަމުގައިވެސް އެކޯޓުން ވިދާޅުވިއެވެ.

އެކޯޓުން ވިދާޅުވީ، ވޭތުވެ ދިޔަ ދޮޅު އަހަރެއްހައި ދުވަސްތެރޭގައި ކޯޓުގެ އެންމެ މާލަމެއްގައި ޝަރީޢަތްތައް ކުރިއަށް ގެންދެވުނު ނަމަވެސް، އެ މުއްދަތުގެ ތެރޭގައި 2934 މީހުންގެ ބަންދާމެދު ގޮތެއް ނިންމައި، 2193 ތަފާތު އެކި ކޯޓު އަމުރުތައް ދޫކޮށް، އަދި 520 ޤަޟިއްޔާ ނިންމާފައިވާ ކަމަށެވެ.