މިއަހަރުގެ ދުނިޔޭގެ ކަނޑުތަކުގެ ދުވަސް ކުލަގަދަކޮށް ފާހަގަކުރުމަށް ހަމަޖައްސާފައިވާ ކަމުގައި، މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ވިދާޅުވެއްޖެއެވެ.

އެމިނިސްޓްރީން މިއަދު ވަނީ ކަނޑުތަކުގެ ދުވަސް ކުލަގަދަ ގޮތެއްގައި ފާހަގަކުރުމަށް ކުރިޔަށް ގެންދާނެ ހަރަކާތްތަކާއި ގުޅޭ ގޮތުން ރާއްޖޭގެ މީޑިއާތަކަށް މައުލޫމާތު ދިނުމަށް ނޫސްވެރިންގެ ބައްދަލުވުމެއް ބާއްވާފައެވެ.

ނޫސްވެރިންގެ މިބައްދަލުވުމުގައި، އެމިނިސްޓްރީގެ ސްޓޭޓް މިނިސްޓަރ މުޙައްމަދު މުއްޠަލިބް ވިދާޅުވީ، އެމިނިސްޓްރީން ރާވާފައި ވަނީ، ކަނޑުތަކުގެ ދުވަސް ފާހަގަކުރުމަށް ހިންގާ ހަރަކާތްތަކުގައި ވީހާވެސް ގިނަ ބަޔަކު ބައިވެރިކޮށްގެން އެހަރަކާތްތައް ކުރިޔަށް ގެންދިޔުމަށް ކަމަށެވެ.

މިގޮތުން ކަނޑުތަކުގެ ދުވަސް ފާހަގަކުރުމަށް ކުރިޔަށް ގެންދިޔުމަށް ރާވާފައިވާ ހަރާކާތްތަކުގެ ތެރޭގައި ސުވާލު މުބާރާތަކާއި، ކުރެހުމުގެ މުބާރާތެއް، އަދި މަޒުމޫނު ލިޔުމުގެ މުބާރާތެއް ބޭއްވުމާއި، މަސްރޭހާއި، މޫދާއި ގޮނޑުދޮށްތައް ސާފުކުރުމުގެ ހަރަކާތްތަކުގެ އިތުރުން "އެންމެ މޫދަށް"ގެ ނަމުގައި ބާއްވާ ޚާއްޞަ މޫދު ހަރަކާތް ހިމެނެއެެވެ. މީގެ އިތުރުން މިދުވަހާއި ގުޅިގެން ކަނޑުތަކާއި މެދު އާއްމު ހޭލުންތެރިކަން އިތުރުކުރުމަށް، މައުލުމާތު ދިނުމުގެ ސެޝަންތައް ކުރިޔަށް ގެންދިޔުމަށްވެސް ރާވާފައިވާ ކަމުގައި މުއްޠަލިބު ވިދާޅުވިއެވެ. އަދި ކަނޑުތަކުގެ ދުވަހާއި ގުޅިގެން ކުރިޔަށް ގެންދާ ހަރަކާތްތއައް ނިންމާލާނީ ޚާއްސަ ފެސްޓިވަލަކުން ކަމުގައިވެސް އޭނާ ވިދާޅުވިއެވެ.

ދުނިޔޭގެ ކަނޑުތަކުގެ ދުވަހާއި ގުޅިގެން ކުރިޔަށް ގެންދާ ކުރެހުމުގެ މުބާރާތާއި މަޒުމޫނު ލިޔުމުގެ މުބާރާތުގައި ބައިވެރިވުމަށް އެމިނިސްޓްރީން މިއަދު ވަނީ ހުޅުވާލާފައެވެ.

ކޮންމެ އަހަރެއްގެވެސް ޖޫންމަހުގެ 8 ވަނަ ދުވަސް ފާހަގަކުރަނީ ދުނިޔޭގެ ކަނޑުތަކުގެ ދުވަހުގެ ގޮތުގައެވެ.