މިއަހަރު ރާއްޖެއިން ހައްޖަށްދާ މީހުންގެ ފުރަތަމަ ގުރޫޕް ރޭގައި މައްކާއަށް ހިނގައްޖެއެވެ.

މިނިސްޓްރީ އޮފް އިސްލާމިކް އެފެއާޒުން ވިދާޅުވީ، މައްކާގައި ދިވެހި ޙައްޖުވެރިން ތިބުމަށް ހަމަޖެހިފައިވަނީ އަލްބަލަދުއް ޠޮއްޔިބް އަޖްޔާދު ހޮޓަލުގައި ކަމަށާއި، ފުރަތަމަ ގުރޫޕްގެ މީހުންނަށް ރޭ ހޮޓަލަށް ގޮސްފައިވާ ކަމަށެވެ. އަދި ފުރަތަމަ ގުރޫޕުގައި ދިޔަ އެންމެންގެ ހާލުވެސް ރަނގަޅު ކަމުގައި އެމިނިސްޓްރީން ވިދާޅުވިއެވެ.

މީގެ އިތުރުން މިގުރޫޕްގައި ހިމެނޭ މީހުން ފުރަތަމަ އުމުރާ މިއަދު ވަނީ ފުރިހަމަކޮށްފައި ކަމުގައިވެސް މައުލޫމާތު ލިބިފައިވެއެވެ.

ރާއްޖެއިން ހައްޖަށްދާ މީހުންގެ ފުރަމަ ގުރޫޕް އިއްޔެ މާލެއިން ފުރީ ހަވީރުގައެވެ. މިގުރޫޕުގައި ހިމެނެނީ 272 މީހުންނެވެ.

މިއަހަރު ރާއްޖެއިން 1000 މީހުން ހައްޖަށް ގެންދިޔުމަށް ވަނީ ކޯޓާ ލިބިފައެެވެ. އެކޯޓާގެ ތެރެއިން 50 ކޯޓާ ހާއްސަކޮށްފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ވަޢުދުފުޅާއި އެއްގޮތަށް ހައްޖަށް ދިޔުމުގެ ފުދުންތެރިކަން ނެތް މީހުން ހައްޖަށް ގެންދިޔުމަށެވެ.

މިއަހަރުގެ ހައްޖުގެ އަޅުމަކަށް ދުނިޔޭގެ އެކި ކަންކޮޅުތަކުން މާތްވެގެންވާ މައްކާގެ ބިމަށް 2.5 މިލިއަން މީހުން ޖަމާވާނެއެވެ. މިއަހަރުގެ ހައްޖު ދުވަސް ދިމާވަނީ، މީލާދީ ކަލަންޑަރުން މިފެށުނު ޖޫންމަހުގެ 16ވާ އާދީއްތަ ދުވަހާއިއެވެ.