އިޒްރޭލުގެ ޕާސްޕޯޓެއް އޮންނަ އެއްވެސް މީހަކު ރާއްޖެ އެތެރެވުން މަނާކުރުމަށް، ދިވެހިރާއްޖޭގެ އިމިގްރޭޝަންގެ ޤާނޫނަށް އިސްލާޙް ހުށައަޅައިފިއެވެ.

މިއިސްލާޙު ހުށައަޅުއްވާފައި ވަނީ، ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަޙްމަދު ނަސީމެވެ.

ބިލް ހުށައެޅުއްވި ސަބަބެއްގެ ގޮތުގައި މީކާއިލް ބަޔާން ކުރައްވާފައި ވަނީ، އިޒްރާއީލުން ފަލަސްޠީނުގެ ދަރިފަސްކޮޅު ނައްތާލުމަށް ހިންގަމުންދާ ޤަތުލުއާއްމާއި ދެކޮޅަށް ދިވެހިރާއްޖެއިން ފިޔަވަޅު އެޅުމުގެ ގޮތުން ކަމަށެވެ. އަދި އިޒްރާއީލްގެ ރައްޔިތުން އެތެރެވުން މަނާކުރުމަށް ގޮވާލާ 19 ވަނަ ރައްޔިތުންގެ މަޖިލީހުން ޤަރާރެއް ފާސްކޮށްފައި ވީނަމަވެސް، ސަރުކާރުން މިހާތަނަށް މިކަމުގައި އަަމަލުކުރާނެ ގޮތެއް ސާފުކޮށްދީފައި ނުވާތީ، އަދި މިކަން ކުރެވޭނެ ވަކި މުއްދަތެއްވެސް އެނގެން ނެތަތީ ސީދާ ޤާނޫނަށް ބަދަލު ގެނެސްގެން ފިޔަވަޅު އެޅުން އަަވަސް ކުރުމަކީވެސް މިބިލް ހުށައެޅުއްވި ސަބަބެއް ކަމުގައި މީކާއީލް ފާހަގަ ކުރައްވާފައެވެ.

މީކާއިލް އިސްލާޙް ހުށައަޅުއްވާފައި ވަނީ، ދިވެހިރާއްޖޭގެ އިމިގްރޭޝަންގެ ޤާނޫނުގެ 6 ވަނަ މާއްދާގެ (ހ)ގެ 7 ވަނަ ނަމްބަރުގެ ފަހަތަށް ނަމްބަރެއް އިތުރު ކުރުމަށެވެ. މިގޮތުން އެމާއްދާގެ (ހ)ގެ 8 ވަނަ ނަމްބަރުގެ ގޮތުގައި، އިޒްރާއިލް ޕާސްޕޯޓު ގެންގުޅޭ މީހުން ރާއްޖެ އެތެރެވުން ހުއްދަ ނެތް މީހުންގެ ގޮތުގައި ވަނީ ހިމަނާފައެވެ. މިގޮތުން މިމާއްދާގެ ދަށުން، އިޒްރޭލުގެ ޕާސްޕޯޓެއްގެ އިތުރުން އިތުރު އެހެން ޕާސްޕޯޓެއް އޮންނަ މީހުންވެސް ހިމަނާފައި ވަނީ ރާއްޖެއަށް އެތެރެވުމުގެ ހުއްދަ ނެތް މީހުންގެ ގޮތުގައެވެ.

ދުނިޔޭގެ ވަރަށް ގިނަ ޤައުމުތަކުން، ޚާއްޞަކޮށް އިސްލާމީ ދުނިޔޭގެ ޤައުމުތަކުން އިޒްރޭލަކީ ދައުލަތެއް ކަމަށް ބަލައި ނުގަންނާތީ، އެޤައުމުތަކަށް ދަތުރު ކުރުމަށް އިޒްރޭލުގެ މީހުން އެހެން ޤައުމުތަކުގެ ޕާސްޕޯޓުތައް ގެންގުޅެއެވެ.

ރާއްޖެއަށް އިޒްރޭލު މީހުން އެތެރެވުން ހުއްޓުވުމަށާއި، އިޒްރޭލް ޕާސްޕޯޓު ރާއްޖެއިން ބަލައި ނުގަތުމަށް އާއްމުން ދަނީ ސަރުކާރަށް ގޮވާލަމުންނެވެ.