ހުޅުމާލޭގައި މިއަދު ހަވީރު ލައިސަންސް ނެތި މީހަކު ދުއްވި ކާރެއް ސައިކަލެއްގައި ޖެހި އެކްސިޑެންްޓް ވެއްޖެއެވެ.

ފުލުހުންގެ އިދާރާއިން ވިދާޅުވީ، ކާރާއި ސައިކަލެއް ޖެހި އެ އެކްސިޑެންޓް ހިނގާފައި ވަނީ މިއަދު ހަވީރު ހުޅުމާލެ ރީތިގަސް މަގުން، މޯލްޑިވްސް ކަރެކްޝަނަލް ސަރވިސް ކައިރީގައި ކަމަށެވެ. އެކްސިޑެންޓް ފުލުހުންނަށް ރިޕޯޓްކޮށްފައި ވަނީ މިއަދު ހަވީރު 16:40 ހާއިރުގައި ކަަމަށްވެސް ފުލުހުންގެ އިދާރާއިން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، މިއެކްސިޑެންޓްގައި ސައިކަލު ދުއްވި އުމުރުން 35 އަހަރުގެ ދިވެހި ފިރިހެނަކަށް އަނިޔާވެގެން ހުޅުމާލެ ހޮސްޕިޓަލުގައި އޭނާއަށް ފަރުވާ ދެމުންގެންދާ ކަމަށެވެ. 

ފުލުހުން ވިދާޅުވީ، ކާރު ދުއްވި މީހާގެ އަތުގައި ލައިސަންސް ނެތް ކަމަށާއި އެހެން ނަމަވެސް ސައިކަލު ދުއްވި މީހާގެ އަތުގައި ލައިސަންސް އޮތް ކަމަށެވެ. 

ފުލުހުން ވިދާޅުވީ މިއެކްސިޑެންޓްގެ މައްސަލަ ފުލުހުން ބަލަމުން އަންނަ ކަމަށެވެ.