ލައިސަންސް ދޫކުރުމުގެ މަސައްކަތް ހަވާލުކުރެވިފައިވާ ބައެއް ކައުންސިލްތަކުން ޤަވާއިދާ ޚިލާފަށް އަދި އެސެސްކުރުމެއްނެތި ލައިސަންސް ދޫކުރަމުންދާ ކަމުގައި މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން މުހައްމަދު އަމީން ވިދާޅުވެއްޖެއެވެ.

އަޑުގެ ސެނެކޯ މާލަމްގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރ އަމީން ވިދާޅުވީ، ބައެއް ކައުންސިލްތަކުން ކަނޑައެޅިފައި އޮތް މިންގަނޑުން ބޭރުން އަދި އެސެސްކުރުމެއް ނެތި، ލައިސަސް ދޫކުރާ ކަމަށް ދެކެވޭ ވާހަކަތަކަކީ ޙަޤީޤަތެއް ކަމަށެވެ. އެހެން ނަމަވެސް މިސަރުކާރުގެ ސިޔާސަތަކީ އެކަންކަމަށް ވަގުތުން ފިޔަވަޅު އެޅުން ނޫންކަމަށާއި، އެކަންކަން ހައްލުކުރުމަށް މިނިސްޓްރީގެ ތެރޭގައި ނިޒާމެއް ޤާއިމްކުރަމުންދާ ކަމަށެވެ.

މިނިސްޓަރ އަމީން ވިދާޅުވީ، އެއްގަމު އުޅަނދުފަހަރުގެ ލައިސަންސްފީވެސް މިހާރު ކައުންސިލްތަކަށް ލިބޭ ގޮތަށް ޕޯޓަލްއިން ބަދަލު ގެނެސްފައިވާ ކަމަށެވެ.

އަތޮޅުތަކުގައި ލައިސަންސް ދިނުމުގެ ހުއްދަ ދޫކޮށްފައިވާ ކައުންސިލްތަކުން، އެއްގަމު އިންޖީނުލީ އުޅަނދުފަހަރުގެ ލައިސަންސް ދޫކުރުމުގައި، ޓްރާންސްޕޯޓުން ޢަމަލުކުރުމަށް ކަނޑައަޅާފައިވާ ޤަވާއިދާއި އެއްގޮތަށް އަމަލު ނުކުރާކަން އެނގޭ ކަމުގައި މިނިސްޓަރު ވިދާޅުވި ނަމަވެސް އެ ކައުންސިލްތަކަކީ ކޮބައިކަމެއް އަދި މިހާތަނަށް އެކައުންސިލްތަކާއި މެދު އަޅުއްވާފައިވާ ފިޔަވަޅަކީ ކޮބައިކަމެއް ހާމަކުރައްވާފައެއް ނުވެއެވެ.