މިސަރުކާރުގެ އެންމެ މުހިއްމު އެއް އަމާޒަކީ، ރައްޔިތުންނަށް އަމާން މާހައުލެއް ހޯދައި ދިނުން ކަމުގައި، ދާޚިލީ ސަލާމަތާއި ފަންނިއްޔަތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އައްޑޫ ސިޓީގައި ހުންނަ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓުގައި ރޭ ބޭއްވި ފުލުހުންގެ 36 ވަނަ އަސާސީ ތަމްރީނު ކޯސް ނިންމުމުގެ ރަސްމިއްޔާތު ޝަރަފްވެރިކޮށްދެއްވައި ދެއްކެވި ވާހަކަފުޅުގައެވެ.

މިނިސްޓަރ އިޙްސާން ވިދާޅުވީ، ކުށްކުރުން މަދުކޮށް ކުށަށް އަރައިގަންނަ މީހުންގެ މައްސަލަ އަވަހަށް ތަޙްޤީޤުކޮށް ރައްޔިތުންނަށް އިންސާފު ޤާއިމްކޮށް ދިނުމަކީ، ދައުލަތުގެ އެންމެ މުހިއްމު އެއް ވާޖިބު ކަމަށެވެ. އެހެން ކަމުން، އެކަން ހާޞިލް ކުރުމަށްޓަކައި އެންމެ މުހިއްމު ދައުރެއް އަދާކުރަންޖެހޭ ބަޔަކީ، ދިވެހި ފުލުހުންކަން މިނިސްޓަރ އިޙްސާން ފާހަގަކުރެއްވިއެވެ. އަދި މިއަދު ދިވެހި ރައްޔިތުންނާއި ދިވެހި ސަރުކާރުން ފުލުހުންގެ ކިބައިން އެދޭ ގިނަ ކަންތައްތަކަކާއި، ކުރާ ފޮނި އުއްމީދު ތަކެއް އެބަހުރި ކަމުގައި އެމަނިކުފާނު ވިދާޅުވިއެވެ.

މިނިސްޓަރ އިޙްސާންގެ ވާހަކަފުޅުގައި ވަނީ، އެކަންކަން ކާމިޔާބު ކުރުމަށް، އަލަށް ފުލުހުންގެ ޚިދުމާއި ގުޅުނު ފުލުހުންވެސް ވެރިންގެ އިރުޝާދާއި އެއްގޮތަށް މަސައްކަތްތައް ކުރެއްވުމަށް އެދިވަޑައިގެންފައެވެ. އަދި އެތެރެއާއި ބޭރުންވެސް އެކަން ކަމުގައި އުޅޭ މީހުންގެ ފަރާތްތަކުން ނުރަނގަޅު ނުފޫޒުތައް އަންނާނޭކަން ފާހަގަކުރައްވައި އެކަންކަމަށް ސަމާލުވެ ތިބުމަށްވެސް މިނިސްޓަރ އެދިވަޑައިގެންނެވިއެެވެ.

ފުލުހުންގެ 36 ވަނަ އަސާސީ ތަމްރީނު ކޯސް ފުރިހަމަކޮށް 164 ފުލުހުން ވަނީ ފުލުހުންގެ ޚިދުމަތާއި ގުޅިފައެވެ.