ފަލަސްޠީނުގެ މުސްލިމް އަޚުންނާއި އުޚުންތުންގެ ރައްކާތެރިކަމަށް އެދި، ރާއްޖޭގެ މިސްކިތްތަކުގައި އަލުން ޤުނޫތު ކިޔުމަށް މިނިސްޓްރީ އޮފް އިސްލާމިކް އެފެއާޒުން ނިންމައިފިއެވެ.

އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސައީދު ވިދާޅުވީ، މިއަދު މިސްކިތްތަކުގެ އިމާމުންނަށް މިނިސްޓްރީ އެކަން އަންގާނެ ކަމަށެވެ.

މިނިސްޓަރ ޝަހީމް ވިދާޅުވީ، މުސްލިމުންނަކީ އެއް ހަށިގަނޑެއްކަމަށާއި އިސްލާމީ އުންމަތަށް ދިމާވެފައިވާ ހިތްދަތި މިވަގުތަކީ އިހުލާސްތެރިކަމާ އެކު ދުއާ ކުރަންވީ ވަގުތުކަމަށެވެ.

Advertisement

މިނިސްޓްރީ އޮފް އިސްލާމިކް އެފެއާޒުން ނިންމާފައި ވަނީ، މިރެއިން ފެށިގެން ޖަމާޢަތުގައި ކުރެވޭ، މަޣުރިބު ނަމާދާއި ފަތިސް ނަމާދުގައި ޤުނޫތު ކިޔުމަށެވެ.

މިދިޔަ އޮކްޓޫބަރު މަހުގެ 7 ވަނަ ދުވަހުން ފެށިގެން، އިޒްރޭލު މީހުން ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ ޢުދުވާންތަކާއި ޤަޠުލްޢާއްމުތަކާއި ގުޅިގެން، ރާއްޖޭގެ މިސްކިތްތަކުގައި ފުރަތަމަ ޤުނޫތު ކިޔަން ފަށާފައި ވަނީ އޮކްޓޯބަރު މަހުގެ 11 ވަނަ ދުވަހުގައެވެ. އަދި އޭގެ ފަހުން ފަރުޟު ހުރިހާ ނަމާދެއްގައި، ޤުނޫތު ކިޔަންފެށީ އޮކްޓޫބަރު މަހުގެ 18 ވަނަ ދުވަހުން ފެށިގެންނެވެ.

އިޒްރޭލުން ފަލަސްތީނުގައި ހިންގަމުންދާ ގަތުލްއާމާއި ޔަހޫދީންގެ އަނިޔާއިން ފަލަސްތީނުގެ ރައްޔިތުން ސަލާމަތްކޮށްދެއްވުން އެދި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފަރުޟު ފަސްނަމާދުގައި ކިޔަން ފެށި ގުނޫތު ކިޔުން ހުއްޓާލީ، މިސަރުކާރު ވެރިކަމަށް އައުމަށް ފަހުގައި، މިއަހަރުގެ ފެބުރުއަރީ މަހުގެ 4 ވަނަ ދުވަހުގެ ރޭގެ މަޣުރިބު ނަމާދުން ފެށިގެންނެވެ.

އޮކްޓޫބަރު މަހުގެ 7 ވަނަ ދުވަހުން ފެށިގެން ފަލަސްޠީނުގެ ރައްޔިތުންނާއި ދެކޮޅަށް އިޒްރާއީލުން ހިންގަމުންދާ އުދުވާންތަކުގައި ވަނީ، 35000 ވުރެ ގިނަ މީހުން ޝަހީދުކޮށްލައި، ލައްކައެއްހާ މީހުން ޒަޚަމްކޮށްލާފައެވެ.

މީގެ އިތުރުން އިޒްރާއީލުގެ ހައްދުފަހަނައެޅި ޔަހޫދީ ސިފައިން ރަފަޙްއަށް އަލިފާން ބޮންއަޅައި، ގެދޮރު ގެއްލިފައިވާ ފަލަސްޠީނުގެ މުސްލިމުންގެ ތެރެއިން ގިނަ ބަޔަކު ވަނީ، ނިދާފައި ތިއްބައި، ދިރިތިއްބައި އަންދާލާފައެވެ.