މަޖިލީހުގެ މެމްބަރުންގެ ވާޖިބު ފުރިހަމައަށް އަދާކުރެއްވުމަށް ކުރީގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އެދިވަޑައިގެންފިއެވެ.

އެމަނިކުފާނު ވަނީ، މިއަދު މެމްބަރުކަމުގެ ހުވާ ކުރެއްވި، 20 ވަނަ ރައްޔިތުންގެ މަޖިލީހުގެ ހުރިހާ މެމްބަރުންނަށް ތަޙްނިޔާ އާއި މުބާާރިކްބާދީ ފޮނުއްވާފައެވެ.

ކުރީގެ ރައީސް ޞާލިޙްގެ ތަޙްނިޔާގެ މެސެޖުގައި ވިދާޅުވީ، މެންބަރުންނަށް ރައްޔިތުން ހަވާލުކުރެއްވި މުހިއްމު ވާޖިބު އެންމެ ފުރިހަމައަށް އަދާކުރައްވައި ޤާނޫނު އަސާސީއާއި ޑިމޮކްރަސީގެ ރިވެތި އުސޫލްތަކުގެ މަތީގައި ދެމިތިއްބަވައި ޤައުމަށާއި ރައްޔިތުންގެ ކުރިއެރުމަށް ގިނަ މަސައްކަތްތަކެއް ކޮށްދެއްވާނެ ކަމުގައި އުއްމީދު ކުރައްވާ ކަމަށެވެ.

20 ވަނަ ރައްޔިތުންގެ މަޖިލީހަށް އިންތިޚާބުވި 93 މެމްބަރުންގެ ތެރެއިން އެމްޑީގެ މެމްބަރުންގެ އަދަދަކީ، 12 އެވެ. އަދި މިފެށުނު މަޖިލީހުގައި ސަރުކާރު ހިންގާ ޕީއެންސީއަށް 75 ގޮނޑިއާއެކު މަޖިލީހުގެ ސުޕަރ މެޖޯރިޓީ ވަނީ ލިބިފައެވެ.