ރައްޔިތުންގެ މަޖިލީހުގެ ނައިބު ރައީސްގެ މަޤާމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހްމަދު ނާޒިމް ހޮވައިފިއެވެ.

މަޖިލީހުގެ ނައިބު ރައީސް ހޮވުމަށް ރައްޔިތުންގެ މަޖިލީހުގައި ނެގި ސިއްރު ވޯޓުގައި، އަޙްމަދު ނާޒިމަށް ލިބިވަޑައިގެންނެވީ 80 ވޯޓެވެ. އޭނާ އާއި ވާދަކުރެއްވި، ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އަޙްމަދު ދީދީއަށް ލިބިވަޑައިގެންނެވީ 12 ވޯޓެވެ. ބާޠިލް ވޯޓެއް ނެތް އިރު، ސައްޙަ ވޯޓުގެ އަދަދަކީ، 85 އެކެވެ. މަޖިލީހުގެ ނައިބު ރައީސް ހޮވުމަށް ނެގި ސިއްރު ވޯޓުގައި ބައިވެރިވެ ވަޑައިގެންނެވީ މަޖިލީހުގެ މެމްބަރުންގެ ތެރެއިން 92 މެމްބަރުންނެވެ. މަޖިލީހުގެ ރިޔާސަތުގައި އިންނެވި، ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހްމަދު ސިޔާމް މަޖިލީހުގެ ރައީސާއި ނައިބު ރައީސް އިންތިޚާބު ކުރުމަށް ނެގި ސިއްރު ވޯޓުގައި ބައިވެރިވެވަޑައެއް ނުގަންނަވަައެވެ.

ރައްޔިތުންގެ މަޖިލީހުގެ ނައިބު ރައީސް ކަމުގެ މަޤާމަށް ހޮއްވެވި، ދިއްގަރު ދާއިރާގެ މެމްބަރު އަޙްމަދު ނާޒިމް އެމަޤާމަށް ހޮއްވެވުމަށް ތާއީދު ކުރައްވާކަމުގައި ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވަނީ ވިދާޅުވެފައެވެ. 

20 ވަނަ ރައްޔިތުންގެ މަޖިލީހުގެ ނައިބު ރައީސް ކަން ކުރެއްވި، ދިއްގަރު ދާއިރާގެ މެމްބަރު އަޙްމަދު ނާޒިމާކީ، މީގެ ކުރިންވެސް މަޖިލީހުގެ ނައިބު ރައީސް ކަން ކުރައްވާފައިވާ ބޭފުޅެކެވެ.