އައު ސީޕްލޭން ޓާމިނަލް ހުޅުވިތާ ދެ އަހަރު ފަހުން، އެތަން ޝެރަޓަން ފުލް މޫން ރިޒޯޓަށް ބަދަލުކުރަން ނިންމާފައިވާކަމަށް އިކޮނޮމިކް މިނިސްޓަރު، މުހައްމަދު ސައީދު، މިއަދު ވިދާޅުވެއްޖެއެވެ. މިނިސްޓަރ މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

ސީޕްލޭން އޮޕަރޭޝަން އާއި ސީޕްލޭން ޓާމިނަލް ފުލްމޫން ރިސޯޓަށް ބަދަލު ކުރުމަކީ އެ ކަމަށް އެންމެ ފީޒަބަލް ވާނެ ގޮތް ކަމަށް، މިއަދުގެ ބައްދަލުވުމުގައި މިނިސްޓަރ ވިދާޅުވެފައިވެއެވެ. އަދި މި ބަދަލާއެކު، ވެލާނާ އިންޓަނޭޝަނަލް އެއާޕޯޓަށް ބޭނުންވާ ޖާގަ އިތުރުކުރެވި، މުޅި ސީޕްލޭން އޮޕަރޭޝަނާއި، އިންޓަނޭޝަނަލް ފްލައިޓްތަކުގެ އޮޕަރޭޝަން ހަލުއި ކުރެވިގެން ދާނެކަމަށް މިނިސްޓަރ ވިދާޅުވިއެވެ.

މިނިސްޓަރ އިތުރަށް ވިދާޅުވީ، ޖެޓް ޓާމިނަލެއްގެ ވިޔަފާރި ރާއްޖޭގައި އުފަން ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅެއް ކަމަށާއި، މި ބަދަލާ ގުޅިފައިވާ އަނެއް ފައިދާއަކަށްވެގެން ދާނީ، ޖެޓް ޓާމިނަލެއްގެ ވިޔަފާރި ރާއްޖޭގައި ފެށިގެން ދިއުމެވެ.

"ރަސްމީ ޖެޓް ޓާމިނަލެއް ނެތް. އެހެންވީމަ ރައީސުލްޖުމްހޫރިއްޔާގެ ވިސްނުންފުޅުގައި، ޖެޓް ޓާމިނަލެއް އަލަށް އެ ވިޔަފާރި ރަސްމީކޮށް އުފަންކޮށްގެން ކުރިއަށް ވަޑައިގަންނަވަން ބޭނުންފުޅުވަނީ. އެއާ އެކު އެއާޕޯޓު ކެޕޭސިޓީ ވެސް ބޯޑު ކުރަން ޖެހޭ،"

ޖެޓް ޓާމިނަލްގެ ވިޔަފާރިއަށް އިޝާރާތްކުރައްވައި މިނިސްޓަރ ސައީދު ވިދާޅުވިއެވެ.

މީގެ އިތުރުން، ދުނިޔޭގެ އެންމެ ބޮޑު ސީޕްލޭން ފްލީޓް ރާއްޖޭގައި އޮތްހިނދު، މިފަދަ ބޮޑު އޮޕަރޭޝަނެއް ވެލާނާ އިންޓަނޭޝަނަލް އެއާޕޯޓުގެ ރަންވޭ އާއި ކައިރީގައި ހިނގަމުން ދިއުމުގެ ސަބަބުން ދިމާވާ ގިނަ ގޮންޖެހުންތަކެއް ހުންނަ ކަމަށާއި، އަދި ސީޕްލޭން ޓާމިނަލް އެހެން ތަނަކަށް ބަދަލުކުރުން މުހިންމުކަމަށް ވެގެންދަނީ އެ އެއާޕޯޓުގެ ރަންވޭ ބޭނުންކުރުމުގައި ލުއިތަކެއް ހޯދުމުގެ ބޭނުމުގައި ކަމަށް ވެސް މިނިސްޓަރ ސައީދު ވިދާޅުވެފައިވެއެވެ.

"ނޫވިލު" ނަމަކަށް ކިޔާ އައު ސީޕްލޭން ޓާމިނަލް ހުޅުވާފައިވަނީ 2022 ވަނަ އަހަރުއެވެ. އެ މަޝްރޫއަކީ 55 މިލިއަން ޑޮލަރުގެ ޕްރޮޖެކްޓެކެވެ.