ސްރީލަންކާއިން އެޤައުމުގެ ވިސާ ސްކީމަށް ބަދަލުތަކެއް ގެނައި ނަމަވެސް އެކަމުގެ ސަބަބުން ދިވެހިންނަށް އަސަރެއް ނުކުރާނެ ކަމަށާއި، މިހާރުވެސް ދިވެހިންނަށް ލިބޭ 30 ދުވަހުގެ އޮން އެރައިވަލް ވިސާ، ކުރިއެކޭވެސް އެއްގޮތަށް ލިބޭނޭ ކަމުގައި ފޮރިން މިނިސްޓްރީން ވިދާޅުވެއްޖެއެވެ.

މިނިސްޓްރީ އޮފް ފޮރިން އެފެއާޒުން ވިދާޅުވީ، ދިވެހިރާއްޖެއާއި ސްރީލަންކާ އާއި ދެމެދުވެފައިވާ އެއްވެސް އެއްބަސްވުމަކަށް ބަދަލެއް އައިސްފައި ނުވާ ކަމަށެވެ. އަދި އޮން އެރައިވަލް ވިސާ ކުރިއެކޭ އެއްގޮތަށް ލިބުނު ނަމަވެސް، އަލަށް ގެނައި ބަދަލާއި އެކު އިތުރު ހަމަސް ދުވަހަށް ވިސާގެ މުއްދަތު އިތުރު ކުރަން ހުށައަޅަން ޖެހެނީ އަަލަށް ޤާއިމްކޮޮށްފައިވާ ޕޯޓަލް މެދުވެރިކޮށެވެ. މިޕޯޓަލްގެ އެޑްރެހަކީ، https://www.srilankaevisa.lk އެވެ. މީގެ އިތުރުން މިހާރު ސްރީލަންކާގައި ދިރިއުޅޭ ފަރާތްތަކުން ވިސާ އިތުރު ކުރުމާއި ގުޅޭ ކަންކަން ކޮލަމްބޯގައި ހުންނަ ދިވެހިރާއްޖޭގެ ހައިކޮމިޝަނާއި ގުޅިގެން ކުރިޔަށް ގެންދިޔުމަށްވެސް ފޮރިން މިނިސްޓްރީން ވަނީ އެދިފައެވެ.