ގެނބެމުންދިޔަ ފަތުރުވެރިޔަކު ސަލާމަތް ކުރަން އުޅުމުގެ ތެރޭގައި ދިވެހި މުވައްޒަފު ގެނބިގެން ނިޔާވެއްޖެއެވެ.

މިހާދިސާ ހިނގާފައި ވަނީ، އދ. އަތޮޅު ސެންޓާރާ ގްރޭންޑް އައިލެންޑް ރިޒޯޓުގައެވެ. 

ފުލުހުންގެ އިދާރާއިން ވިދާޅުވީ ހާދިސާގެ ރިޕޯޓް ފުލުހުންނަށް ލިބިފައި ވަނީ މިއަދުގެ ހެނދުނު 11:05 ހާއިރުގައި ކަމަށާއި، ހާދިސާގައި ގެނބެމުން ދިޔަ ޗައިނާގެ ފަތުރުވެރިޔާ ސަލާމަތްވެފައި ވީ ނަމަވެސް، އޭނާ ސަލާމަތްކުރަންް ފޭބި ދިވެހި މުވައްޒަފު މީހާ ވަނީ ނިޔާވެފައި ކަމަށް ފުލުހުން ވިދާޅުވިއެވެ. އޭނާއަކީ އުމުރުން 39 އަހަރުގެ މީހެއް ކަމުގައި ފުލުހުން ވިދާޅުވިއެވެ.

Advertisement

މިއަދު ހިނގި މިހާދިސާގައި ނިޔާވެފައި ވަނީ، އައްޑޫ ސިޓީ ހިތަދޫއަށް ނިސްބަތްވާ އަޙްމަދު އަފްޒަލް އެވެ.

ފުލުހުންގެ އިދާރާއިން ވިދާޅުވީ، ހާދިސާ އާއި ގުޅިގެން ދިވެހި މުވައްޒަފު އދ. ދަނގެތީ ޞިއްޙީ މަރުކަޒަށް ގެންދިޔައިރުވެސް ނިޔާވެފައިވާ ކަމަށް އެމަރުކަޒުން ފުލުހުންނަށް މައުލޫމާތުދީފައިވާ ކަމަށެވެ. އަދި ހާދިސާ ފުލުހުން ދަނީ ތަޙްޤީޤު ކުރަމުން ކަމުގައިވެސް ފުލުހުންގެ އިދާރާއިން ވިދާޅުވިއެވެ.