ދިރާސީ އައު އަހަރުގެ ކިޔެވުން ފެށެންވާއިރަށް، ދަރިވަރުންނަށް ބޭނުންވާ ފޮތްތައް ރަށްރަށަށް ގެންދިއުމުގެ މަސައްކަތް ފަށާފައިވާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ދިރާސީ އައު އަހަރުގެ ކިޔެވުން އާދީއްތަ ދުވަހު ފެށޭއިރު އަތޮޅުތަކާއި މާލޭގެ ގިނަ ސްކޫލުތަކުގައިވެސް ދަރިވަރުންނަށް އަދި ހަަމަޔަށް ފޮތްތައް ލިބިފައެއް ނުވެއެވެ. އެހެން ނަމަވެސް މާލޭގެ ސްކޫލުތަކުގައި އާދީއްތަ ދުވަހުން ފެށިގެން ވަނީ ދަރިވަރުންނަށް ޓެކްސްޓް ފޮތްތައް ދޫކުރަން ފަށާފައެވެ.

ރަށްރަށަށް ޓެކްސްޓް ފޮތްތައް އުފުލައިދިނުމުގެ މަސައްކަތް ފުލުހުންގެ އުޅަނދުތަކުގައި މިއަދު ފަށާފައި ވަނީ، ވަރަށް ބޮޑަށް މޫސުމް ގޯސްވުމުގެ ސަބަބުން އަތޮޅުތަކަށް މުދަލާއި ފަސިންޖަރުން އުފުލާ އުޅަނދުތަކުގެ ދަތުރުފަތުރަށް ހުރަސް އެޅިފައި ވަނިކޮށެވެ. އަދި މިހާތަަނަށް އަތޮޅު ތެރޭގެ ގިނަ ރަށްރަށުގެ ސްކޫލުތަކަށް ޓެކްސްޓް ފޮތްތައް ލިބިފައި ނުވާ ކަމުގައި ސްކޫލުތަކުން މައުލޫމާތު ލިބިފައިވެއެވެ.

ބައެއް ސްކޫލުތަކުގެ ޕްރިންސިޕަލުން މައުލޫމާތު ދެއްވާފައިވާ ގޮތުގައި އާދީއްތަ ދުވަހު ސްކޫލުތައް ހުޅުވޭއިރުވެސް ޓެކްސްޓް ފޮތްތައް ލިބޭނެ ކަމަކަށް ނުބެލެއެވެ.

މީގެ ކުރީގެ އަހަރުތަކުގައި ދިރާސީ އަހަރުގެ ކިޔެވުން ނިމުމުގެ ކުރިން، ކުރިޔަށް އޮންނަ ދިރާސީ އަހަރަށް ބޭނުންވާ ޓެކްސްޓް ފޮތްތައް މިނިސްޓްރީ އޮފް އެޑިޔުކޭޝަނުން ސްކޫލުތަކަށް ފޮނުވާފައިވެއެވެ. މިއަހަރު ޓެކްސްޓް ފޮތްތައް ލިބުން ލަސްވި ސަބަބެއް މިހާތަނަށް މިނިސްޓްރީ އޮފް އެޑިޔުކޭޝަނުން ހާމަކޮށްފައެއް ނުވެއެވެ.