ރައްޔިތުންގެ މަޖިލީހުގެ ރައީސްގެ މަޤާމަށް އަބްދުއްރަހީމް އަދި ނައިބު ރައީސްގެ މަޤާމަށް އަޙްމަދު ނާޒިމް ޢައްޔަނުކުރުމަށް ޕީއެންސީން ނިންމައިފިއެވެ.

އެޕާޓީން މިގޮތަށް ނިންމާފައި ވަނީ، އެޕާޓީން ރައްޔިތުންގެ މަޖިލީހުގެ މެމްބަރުންނާއި އެކު ރައީސުލްޖުމްހޫރިއްޔާ މިއަދު ހަވީރު މުލީއާގޭގައި ބޭއްވެވި ބައްދަލުކުރެއްވުމުގައެވެ. އެދެބޭފުޅުން އެމަޤާމުތަކަށް ޢައްޔަނު ކުރެއްވުމަށް ހުށައެޅުއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒެވެ.

ރައްޔިތުންގެ މަޖިލީހުގެ ރައީސް ކަމުގެ މަޤާމަށް، ޢައްޔަނުކުރެއްވުމަށް ރައީސުލްޖުމްހޫރިއްޔާ ޢަބްދުއްރަޙީމްގެ ނަންފުޅު ހުށައެޅުއްވި އިރު، ޢަބުދުއްރަޙީމްއަކީ މިސަރުކާރު އުފެއްދުމުގެ އެންމެ ބޮޑު މޭސްތިރިޔާއެވެ. ރައީސް ޑޮކްޓަރ މުހައްމަދު މުޢިއްޒާއި އެކުގައި ރިޔާސީ ރޭހަށް ނުކުތުމުގެ ނިންމެވުމުން ނިންމަވައި އެންމެ ބޮޑަށް އެކަމަށް މަސައްކަތް ކުރެއްވި ބޭފުޅަކީ ޢަބުދުއްރަހީމްއެވެ. ރައްޔިތުންގެ މަޖިލީހަށް އޭނާ އިންތިޚާބުވެވަޑައިގެންނެވީ، އޭނާ ނިސްބަތްވާ ފޮނަދޫ ދާއިރާގެ ގޮނޑިއަށް ވާދަކުރައްވައި އެގޮނޑި ކާމިޔާބު ކުރައްވައިގެންނެވެ. 18 ވަނަ ރައްޔިތުންގެ މަޖިލީހުގައިވެސް އަބްދުއްރަހީމް ވަނީ އެދާއިރާގެ ގޮނޑި ފުރުއްވާފައެވެ.

ރައްޔިތުންގެ މަޖިލީހުގެ ނައިބުރައީސް ކަމުުގެ މަޤާމަށް ގެނައުމަށް ރައީސުލްޖުމްހޫރިއްޔާ ހުށައެޅުއްވީ، ދިއްގަރު ދާއިރާގެ މެމްބަރު އަޙްމަދު ނާޡިމެވެ. ނާޡިމަކީ މީގެ ކުރިންވެސް ރައްޔިތުންގެ މަޖިލީހުގެ ނައިބު ރައީސްކަން ކުރައްވާފައިވާ ބޭފުޅެކެވެ. އަދި 18 ވަނަ ރައްޔިތުންގެ މަޖިލީހުގައި ދިއްގަރު ދާއިރާގެ ގޮނޑިވެސް އޭނާ ފުރުއްވިއެވެ.

ރައްޔިތުންގެ މަޖިލިސް އިންތިޚާބުގައި ޕީއެންސީއަށް ލިބުނު ބޮޑު ކާމިޔާބީ އާއިއެކުގައި އެޕާޓީއަށް ރައްޔިތުންގެ މަޖިލީހުގެ 74 މެމްބަރުން އެބަތިއްބެވިއެވެ.

މިއަދު ބޭއްވި ބައްދަލުވުމުގައި ވަނީ، ޕީއެންސީގެ ޕާލަމެންޓްރީ ގްރޫޕްގެ ލީޑަރުކަމަށާއި ނައިބު ލީޑަރުކަމުގެ މަޤާމަށް ޢައްޔަނުކުރައްވާނޭ ބޭފުޅުންވެސް ކަނޑައަޅާފައެވެ. ޕާލަމެންޓްރީ ގްރޫޕްގެ ލީޑަރަކަށް އިނގުރައިދޫ ދާއިރާގެ މެމްބަރު އަޙްމަދު ފަލާޙް އައްޔަނުކުރެއްވުމަށާއި، ޑެޕިއުޓީ ލީޑަރަކަށް ބާރަށު ދާއިރާގެ މެމްބަރު އިބްރާހިމް ޝުޖާއު ޢައްޔަނުކުރެއްވުމަށްވެސް ވަނީ ހުށައަޅުއްވާފައެވެ.