ރާއްޖެއަށް މިހާރު ކުރަމުންދާ ވިއްސާރަ އާއި ގުޅިގެން މާލެ ސަރަހައްދު ހިމެނޭހެން، މެދު ރާއްޖެތެރޭގެ އަތޮޅުތަކަށް މޫސުމާއި ބެހޭ ޤައުމީ އިދާރާއިން ނެރެފައިވާ އޮރެންޖް އެލާޓުގެ ވަގުތު އިތުރުކޮށްފިއެވެ.

މޫސުމާއި ބެހޭ ޤައުމީ އިދާރާއިން ވަނީ މިއަދުގެ މެންދުރު 12:00 އާއި ހަމައަށް ނެރެފައިވާ އޮރެންޖް އެލާޓުގެ ވަގުތު މިއަދުގެ ހަވީރު 4:00 އާއި ހަމައަށް އިތުރުކޮށްފައެވެ. މިވަގުތު އޮރެންޖް އެލާޓް ނެރެފައި އޮތީ، ވ. އަތޮޅުން ފެށިގެން ޅ އަތޮޅާއި ދެމެދުގައި ހިމެނޭ ސަރަހައްދުތަކަށެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، މެދު ރާއްޖެތެރޭގެ ކަނޑުތައް ވަރަށް ގަދަވާނެ ކަމަށާއި، ބޯކޮށްވާރޭ ވެހުމުގެ އިތުރުން، އެވްރެޖްކޮށް 34 މޭލާއި 40 މޭލާއި ދެމެދުގެ ބާރުމިނެއްގައި ވައިޖެހޭނެ ކަމަށެވެ. އަދި ވިލާގަނޑުގައި ގަޑިއަކު، 60 މޭލަށް ވައިގަދަވާނެތީ، ކަނޑުދަތުރުފަތުރު ކުރެއްވުމުގައި މޫސުމަށް ސަމާލުވުމަށްވެސް، މޫސުމާއި ބެހޭ ޤައުމީ އިދާރާއިން އިލްތިމާސްކޮށްފައިވެއެވެ.