އާދީއްތަ ދުވަހު ދިރާސީ އަހަރުގެ ކިޔެވުން ފެށުމުގެ ތައްޔާރުވާއިރު މާދަމާއަކީ، މުދައްރިސުން ސްކޫލުތަކަށް ނުކުންނަން ޖެހޭ ދުވަސް ނަމަވެސް ގިނައަދަދެއްގެ މުދައްރިސުން ރަށުން ބޭރުގައި ތާށިވެއްޖެއެވެ.

ރާއްޖެއަށް މިދުވަސްވަރު ކުރަމުންދާ ވިއްސާރައާއި ގުޅިގެން ކަނޑުމަގުން ކުރާ އާއްމު ދަތުރުފަތުރަށް ހުރަސް އެޅި، ގިނަ އަދަދެއްގެ މުދައްރިސުން ތިބީ މާލޭގައި ތާށިވެފައެވެ. ސްކޫލު ބަންދުގައި ސިއްޙީ ބޭނުންތަކަށާއި، އެހެނިހެން ބޭނުންތަކަށް މުދައްރިސުންވެސް މާލެއަށް އަންނައިރު، އެނބުރި ރަށަށް ފުރޭނެ ގޮތެއް ނެތިފައި ގިނަ އަދަދެއްގެ މުދައްރިސުން މާލޭގައިވެސް އެބަތިއްބެވެ. މޫސުމް ގޯސްވުމުގެ ސަބަބުން އަތޮޅުތަކަށް ކުރާ ލޯންޗު ދަތުރުތަކުުގެ ޝެޑިއުލަށްވެސް ބުރޫ އަރާފައި ވާއިރު، ކަނޑުމަގުން އަތޮޅުތެރެއަށް ކުރާ ލޯންޗު ދަތުރުތައް އޮތީ ގާތްގަނޑަކަށް ހުއްޓިފައެވެ.

މާލެ ސަރަހައްދަށް މޫސުމް ގޯސްވެ އޮރެންޖް އެލާޓު ނެރެފައި ވާއިރު، ކުރިޔަށް އޮތް ތިން ދުވަހަށްވެސް މޫސުމް ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިންވެސް ވަނީ ބުނެފައެވެ. އަދި ދަތުރު ފަތުރު ކުރުމުގައި މޫސުމަށް ސަމާލު ވުމަށާއި، ރޭގަނޑު ދަތުރު ނުކުރުމަށް ސަލާމަތީ ޚިދުމަތްތަކުންވެސް ވަނީ އިލްތިމާސްކޮށްފައެވެ.