އަންނަ އާދީއްތަ ދުވަހު ދިރާސީ އަހަރުގެ ކިޔެވުން ފެށޭއިރު، މިހަފްތާގެ އާދީއްތަ ދުވަހުންފެށިގެން ދަރިވަރުންނަށް ޓެކްސްޓް ފޮތްތައް ދޫކުރަން ފަށައިފިއެވެ.

މާލޭގެ ސްކޫލުތަކުންނާއި އަތޮޅުތަކުގެ ސްކޫލުތަކުގައި ފޮތްތައް ދޫކުރަން ފަށާފައި ވީނަމަވެސް، މާލޭގައިވެސް ބައެއް ގްރޭޑްތަކުގެ ޓެކްސްޓް ފޮތްތައް އަދިވެސް ނުލިބޭތީ ދުލެއް ނުކުރެއެވެ. އަދި މޫސުމް ގޯސްވުމާއި ދަތުރުފަތުރުގެ ދަތިތަކާއި ހުރެ ދެކުނާއި އުތުރުގެ ބައެއް އަތޮޅުތަކުގެ ރަށްރަށުގެ ސްކޫލުތަަކަށް ޓެކްސްޓް ފޮތްތައް ލިބިފައި ނުވާކަމަށް، ބައެއް ސްކޫލުތަކުގެ އިސްވެރިން ވިދާޅުވިއެވެ.

ދިރާސީ އަހަރުގެ ކިޔެވުން އަންނަ އާދިއްތަ ދުވަހު ފެށުމަށް ހަމަޖެހިފައި ވާއިރު، ސްކޫލުތައް ހުޅުވޭއިރުވެސް ހުރިހާ ގްރޭޑެއްގެ ޓެކްސްޓް ފޮތްތައް ހަމަޔަށް ލިބޭނެ ކަމުގެ އުއްމީދެއް ނެތް ކަމުގައި ބައެއް ސްކޫލުތަކުގެ އިސްބޭފުޅުން ވަނީ ވިދާޅުވެފައެވެ.

މީގެ ކުރީގެ އަހަރުތަކުގައި ދިރާސީ އަހަރު ނިމި ރިޕޯޓް ފޯމް ދިނުމުގެ ކުރިން ދަރިވަރުންނަށް ސްކޫލުތަކުން އައު އަހަރަށް ބޭނުންވާ ޓެކްސްޓް ފޮތްތައް ދޫކުރަން ފަށައެވެ.