އިސްލާމިކް ރިޕަބްލިކް އޮފް އީރާނުގެ ރައީސް ޑޮކްޓަރ ސައްޔިދު އިބްރާހީމް ރައީސީ އަވަހާރަވުމާ ގުޅިގެން ރަސްމީ ގޮތުން ހިތާމަ ފާޅުކުރުމަށް ތިން ދުވަސް ވަންދެން ދިވެހި ދިދަ ބައިދަނޑިއަށް ތިރިކުރުމަށް ރައީސުލްޖުމްހޫރިއްޔާ ނިންމަވައިފިއެވެ.

2024 މޭ 21 ވާ އަންގާރަ ދުވަހުން ފެށިގެން 2024 މޭ 23 ވާ ބުރާސްފަތި ދުވަހުގެ ނިޔަލަށް، (ތިން ދުވަސް ވަންދެން) ދިވެހި ޤައުމީ ދިދަ ބައިދަނޑިއަށް ތިރިކުރެއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ނިންމަވާފައެވެ.

ރާއްޖެއިން އީރާނާއި އެކު ޤާއިމްކޮށްފައި އޮތް ގުޅުންތައް، މެދުއިރުމަތީގެ މަޝްރަހަށް އައި ބަދަލުތަކާއި ގުޅިގެން 2016 ވަނަ އަހަރު ކަނޑާލާފައިވެއެވެ. އޭގެ ފަހުން ދިވެހިރާއްޖެއިން އަލުން އީރާނާއި އެކު ގުޅުންތައް ޤާއިމްކުރިކަން އިޢުލާނުކުރީ، 2023 ވަނަ އަހަރުގެ ސެޕްޓެމްބަރު މަހު އޮތް، އދ. ގެ އާއްމު ބައްދަލުވުމުގެ ހަވާސާގެ ތެރެއިން، ފޮރިން މިނިސްޓްރީގެ ކުރީގެ ސްޓޭޓް މިނިސްޓަރ އަބްދުﷲ ޚަލީލް އާއި އިރާނުގެ ފޮރިން މިނިސްޓަރ ޑރ. ހުސެން އާމިރު އަބްދުﷲ ހިއާން ބޭއްވެވި ބައްދަލު ކުރެއްވުމަށް ފަހުގައެވެ.