އީރާންގެ ރައީސް އިބްރާހީމް ރައީސީ އަވަހާރަވުމުގެ ހިތާމައިގައި، އީރާންގެ ރޫހާނީ ލީޑަރު އާޔަތުﷲ ޚާމަނާއީ އެގައުމުގައި، ޤައުމީ ހިތާމައިގެ 5 ދުވަސް އިއުލާނުކުރައްވައިފިއެވެ.

އީރާނުގެ ރައީސާއި އަރިހުގައި ދަތުރުކުރެއްވި ހުރިހާ ބޭފުޅުން އަވަހާރަވެފައި ވަނީ، އެބޭފުޅުން ދަތުރުކުރެއްވި ހެލިކޮޕްޓަރު ވެއްޓުމުގެ ހާދިސާގައެވެ. ހެލިކޮޕްޓަރު ވެއްޓުމަށްފަހު، އެ ވެއްޓުނު ތަން ދެނެގަތުމަށްވެސް 12 ގަޑިއިރަށް ވުރެ ގިނަ އިރު ހޭދަވިއެވެ.

ހެލިކޮޕްޓަރު ވެއްޓުމުގެ ހާދިސާގައި އީރާނުގެ ރައީސް އިބްރާހީމް ރައީސީގެ އިތުރުން، އީރާންގެ ފޮރިން މިނިސްޓަރ ހުސައިން އާމިރް ޢަބުދުލްލަހްޔާން އާއި، އީރާނުގެ އީސްޓް އަޒަރް ބައިޖާން ޕްރޮވިންސްްގެ ގަވަރުނަރު މާލިކް ރަޙްމަތީ އާއި ތަބްރީޒް ޕްރޮވިންސްގެ އިމާމް މުޙައްމަދު ޢަލީ އަލްޙާޝިމް ވަނީ އަވަހާރަވެފައެވެ. އަދި ހެލިކޮޕްޓަރުގެ ދެޕައިލެޓުންނާއި ކުރޫއިންވެސް ވަނީ މަރުވެފައެވެ.

ހާދިސާ ހިނގީ މޫސުމް ގޯސްވެގެން ކަމަށް ވާހަކަތައް ދެކެވުނު ނަމަވެސް އެހާދިސާ އާއި ގުޅިގެން ބައެއް ފަރާތްތަކުން ސުވާލު އުފައްދައެވެ. އީރާންގެ ރައީސް އަޒަރު ބައިޖާން ޕްރޮވިންސަށް ކުރެއްވި ދަތުރު ފުޅަށްފަހު އެނބުރި ތެހެރާނަށް ކުރެއްވި ދަތުރުފުޅުގައި ތިން ހެލިކޮޕްޓަރު ބައިވެރިވެފައިވެއެވެ. އެތިން ހެލިކޮޕްޓަރުގެ ތެރެއިން ވެއްޓުނު ހަމައެކަނި ހެލިކޮޕްޓަރަކީ އީރާނުގެ ރައީސް އިންނެވި ހެލިކޮޕްޓަރެވެ.

އީރާންގެ ރައީސާއި ފޮރިންގ މިނިސްޓަރު އަވަހާރަވުމާއި ގުޅިގެން ދުނިޔޭގެ ޤައުމުތަކުގެ ވެރިން ގެންދަވަނީ، އީރާންގެ ސަރުކާރަށާއި ރައްޔިތުންނަށް ތަޢުޒިޔާގެ މެސެޖުތައް ފޮނުއްވަމުންނެވެ.