އީރާންގެ ރައީސް އިބްރާހީމް ރައީސީ އާއި އެމަނިކުފާނުގެ އަރިހުގައި ދަތުރު ކުރެއްވި އީރާންގެ ސަރުކާރުގެ އިސް އޮފިޝަލުން ތިބި ހެލިކޮޕްޓަރުގެ ބައިތައް ހޯދިއްޖެކަމުގައި އީރާނުން ބުނެފިއެވެ.

ހެލިކޮޕްޓަރު ވެއްޓުނުތަން މިހޯދުނީ ހާދިސާއަށް 12 ގަޑި އިރަށް ވުރެ ގިނަ އިރު ވެފައި ވަނިކޮށެވެ. އީރާންގެ ރެޑް ކްރެސެންޓުން ބުނެފައި ވަނީ ހެލިކޮޕްޓަރު ވެއްޓުނުތަން ހޯދިފައިވާ ކަމަށެވެ. އެހެން ނަމަވެސް އިތުރު ތަފްސީލެއް ނުލިބެއެވެ.

ބައެއް ރިޕޯޓްތައް ބުނާ ގޮތުގައި ހެލިކޮޕްޓަރު ވެއްޓުނީ، މޫސުމް ގޮސްވެ ބިމަށް ޖައްސަން އުޅުމުގެ ތެރޭގައެވެ. އަދި ހެލިކޮޕްޓަރު ވެއްޓުނު ސަރަހައްދާއި ކައިރިއަވަށްތަކުގައި ދިރިއުޅޭ މީހުންނަށް ބާރުގަދަ އަޑުފައްގަނޑެއް އިވުނު ކަމަށް ރިޕޯޓްކޮށްފައިވެއެވެ.

ވެއްޓުނު ހެލި ކޮޕްޓަރު ފެނިފައިވާ ކަމަށް ރިޕޯޓްކޮށްފައި ވީނަމަވެސް، އެއިން ދަތުރުކުރި އެއްވެސް މީހަކު ސަލާމަތްވިކަން ނުވަތަ ނޫންކަން އަދި ހާމައެއް ނުކުރެއެވެ.

އީރާންގެ ރައީސް އިބްރާހީމް ރައީސީ އާއެކު އެ ހެލިކޮޕްޓަރުގައި ތިއްބެވި އީރާނު ސަރުކާރުގެ އިސްބޭފުޅުންގެ ތެރޭގައި އީރާންގެ ފޮރިން މިނިސްޓަރ ހުސައިން އާމިރް ޢަބުދުލްލަހްޔާން އާއި، އީރާނުގެ އީސްޓް އަޒަރް ބައިޖާން ޕްރޮވިންސްްގެ ގަވަރުނަރު މާލިކް ރަޙްމަތީ އާއި ތަބްރީޒް ޕްރޮވިންސްގެ އިމާމް މުޙައްމަދު ޢަލީ އަލްޙާޝިމް ހިމެނިވަޑައިގަންނަވައެވެ.

އީރާންގެ ރައީސް ދަތުރު ކުރެއްވި ހެލިކޮޕްޓަރު ވެއްޓުނު ހާދިސާ އާއި ގުޅިގެން ދުނިޔޭގެ ޤައުމުތަކުގެ ލީޑަރުން ގެންދަވަނީ ހިތާމަފާޅު ކުރައްވަމުންނެވެ.