އިންގްލިޝް ޕްރިމިއަ ލީގު ޖެހިޖެހިގެން ހަތަރުވަނަ ފަހަރަށް މެންޗެސްޓަރ ސިޓީއިން ކާމިޔާބުކޮށްފިއެވެ. ޕެޕް ގާޑިއޯލާގެ އިރުޝާދުގެ ދަށުން ކުޅެންމުން އަންނަ މެންސިޓީއިން މި ހޯދި ކާމިޔާބަކީ އަދި މިހާތަނަށް އިނގިރޭސި ލީގުގައި އެހެން ޓީމަކަށް ހޯދިފައިވާ ކާމިޔާބެއް ނޫނެވެ. މީގެ ކުރިން ޖެހިޖެހިގެން އެންމެ ގިނަ ފަހަރަށް ލީގު ކާމިޔާބު ކުރެވިފައިވަނީ ތިން ފަހަރަށެވެ.

ލީގުގެ ފަހުމެޗާ ހަމައަށް އައިއިރު މެންސިޓީއަށް ލީގު ޔަގީންވެފައި ނުވިނަމަވެސް، ފަހުމެޗުގެ ދެވަނަ މިނެޓުގައި ފިލް ފޮޑެން ކާމިޔާބުކުރި ގޯލާއެކު، ގާތްގަނޑަކަށް އެ ޓީމަށް ލީގު ޔަގީންކުރެވުނެވެ.

ލީގު ތައްޓާ ދެން އެންމެ ވާދަކުރަމުން ދިޔައީ ގާޑިއޯލާގެ ކުރީގެ ދަރިވަރު، މައިކަލް އާޓޭޓާގެ އާސެނަލްއެވެ. ފަހުމެޗާ ހަމައަށް އައިއިރު މެންސިޓީއިން ދެ ޕޮއިންޓުގެ ލީޑެއް ނަގާފައިވުމުން، އާސެނަލްއަށް ލީގު ލިބެން އޮތީ އެމީހުންގެ މެޗު ކާމިޔާބު ކުރިނަމަވެސް މެންސިޓީ ބަލިވެއްޖެނަމައެވެ.

މެންސިޓީއިން ވެސްހޭމް 3-1 އިން ބަލިކުރިއިރު، މެޗުގެ ފަހު މިނެޓު ކޮޅުގައި ޖެހި ގޯލަކާއެކު އާސެނަލް ވެސް ވަނީ ފަހަތުން އަރާ އެވަޓަންގެ މައްޗަށް 2-1 ގެ ކާމިޔާބެއް ހޯދާފައެވެ.

މެންސިޓީއާއި ވެސްޓްހޭމް ބައްދަލުކުރި މެޗުގައި އެ ޓީމުގެ ފުރަތަމަ ދެ ގޯލު ކާމިޔާބުކޮށްދިނީ ފޮޑެންއެވެ. އެއީ މެޗުގެ ދެވަނަ މިނެޓާއި 18 ވަނަ މިނެޓުގައި ޖެހި ގޯލުތަކާއެކުއެވެ. ފުރަތަމަ ހާފު ނިމުމުގެކުރިން ވެސްހޭމްގެ މުޙައްމަދު ކުއްދޫސް ގޯލެއް ކާމިޔާބުކުރިއެވެ. ނަމަވެސް ދެވަނަ ހާފުގެ 14 ވަނަ މިނެޓުގައި ރޮޑްރީ ކާމިޔާބުކުރި ގޯލަކާއެކު، ވެސްޓްހޭމްއަށް މެޗު ގެއްލުނެވެ.

އާސެނަލްއާއި އެވަޓަން ބައްދަލުކުރި މެޗުގައި ފުރަތަމަ ލީޑު ނެގީ އެވަޓަންއެވެ. އަދި އެވަޓަންގެ ގުއެޔޭ 40 ވަނަ މިނެޓުގައި މި ގޯލު ކާމިޔާބުކޮށްފައިވަނިކޮށް، އޭގެ 3 މިނެޓުފަހުން އާސެނަލްގެ ޓޮމިޔަސޫ ވަނީ މެޗުގެ ނަތީޖާ ހަމަހަމަކޮށްފައެވެ. އާސެނަލް މެޗު ކާމިޔާބުކުރީ، މެޗުގެ 89 ވަނަ މިނެޓުގައި ކައި ހަވަޓްސް ކާމިޔާބުކުރި ގޯލަކުންނެވެ.