އީރާންގެ ރައީސް އިބްރާހީމް ރައީސީ އާއި ސަރުކާރުގެ އިސް އޮފިޝަލުން ދަތުރު ކުރައްވަނިކޮށް ވެއްޓުނު ހެލިކޮޕްޓަރު އަދި ނުފެންނަ ކަމުގައި އީރާންގެ ޤައުމީ ޓީވީން ބުނެފިއެވެ.

އީރާންގެ ޤައުމީ ޓީވީން ބުނީ ހެލިކޮޕްޓަރު ވެއްޓިފައިވާ ސަރަހައްދުގެ މޫސުމް ވަރަށް ގޯސް ކަމަށާއި، ދުންފިނި ބޯވުމާއި އެސަރަހައްދަކީ ފަސްގަނޑު ދޫ ފަރުބަދަ މަތީގެ ސަރަހައްދަކަށް ވާތީ ހެލިކޮޕްޓަރު ހޯދުމުގައި ދަތިތަކާއި ކުރިމަތިވެފައިވާ ކަމަށެވެ. އަދި ގެއްލިފައިވާ ހެލިކޮޕްޓަރު ހޯދުމަށް ކުރެވެން ހުރި ހުރިހާ މަސައްކަތެއް ކުރަމުންދާ ކަމަށާއި އީރާން އަސްކަރިއްޔާގެ ހުރިހާ ވަސީލަތެއް އެކަމަށް ބޭނުން ކުރަމުންދާ ކަމަށެވެ.

އަޒަރުބައިޖާނާއި އިރާޤު ސަރުކާރުން ވަނީ، ސަރޗްއެންޑް ރެސްކިއުގައި އީރާނަށް އެހީތެރިވުމަށް ހުށައަޅާފައެވެ.

ހެލިކޮޕްޓަރު ވެއްޓިފައި ވަނީ މޫސުމް ގޯސްވުމުގެ ސަބަބުން ކަމަށް ބެލެވޭ ކަމުގައިވެސް އީރާނުގެ ޤައުމީޓީވީން ބުނެފައިވެއެވެ.

އީރާންގެ ރައީސް އިބްރާހީމް ރައީސީ އާއެކު އެ ހެލިކޮޕްޓަރުގައި ތިއްބެވި އީރާނު ސަރުކާރުގެ އިސްބޭފުޅުންގެ ތެރޭގައި އީރާންގެ ފޮރިން މިނިސްޓަރ ހުސައިން އާމިރް ޢަބުދުލްލަހްޔާން އާއި، އީރާނުގެ އީސްޓް އަޒަރް ބައިޖާން ޕްރޮވިންސްްގެ ގަވަރުނަރު މާލިކް ރަޙްމަތީ އާއި ތަބްރީޒް ޕްރޮވިންސްގެ އިމާމް މުޙައްމަދު ޢަލީ އަލްޙާޝިމް ހިމެނިވަޑައިގަންނަވައެވެ.

އީރާންގެ ރަސްމީ ފަރާތްތަކުން ބުނެފައިވާ ގޮތުގައި ހެލިކޮޕްޓަރު ވެއްޓުމުގެ ހާދިސާގައި، އީރާންގެ ރައީސް އަވަހަރާވެފައިވާކަން ނުވަތަ ނޫންކަން ކަށަވަރެއް ނޫނެވެ.

އީރާންގެ ރައީސް ކަމުގެ މަޤާމަށް އިބްރާހީމް ރައީސީ އިންތިޚާބު ކުރީ 2021 ވަނަ އަހަރުގައެވެ.