އިނގިރޭސި ޕްރިމިއަ ލީގުގެ ފަހު މެޗުތައް މިރޭ ކުޅުމަށް ހަމަޖެހިފައިވާއިރު، ލީގު ކާމިޔާބުކުރުމުގެ ފުރުސަތު މެންޗެސްޓާ ސިޓީ އާއި އާސެނަލްއަށް އޮތް ނަމަވެސް، އެކަން އާސެނަލްއަށް ހާސިލް ނުކުރެވޭނެކަމަށް ކްރިސްޓިއާނޯ ރޮނާލްޑޯ ބުނެފިއެވެ. ރޮނާލްޑޯ މިހެން ބުނީ ސައުދީ އަރަބިއްޔާގެ ރިޔާދުގައި އޮތް ބޮކްސިން މެޗެއް ބަލަން ގޮސް އުޅުމުގެ ތެރޭގައި އާސެނަލްގެ ސަޕޯޓަރަކާ ވާހަކަ ދައްކަމުންނެވެ.

ރޮނާލްޑޯއާ ދެތިން ބަހެއް ބުނެލުމަށްފަހު އާސެނަލްގެ ސަޕޯޓަރ ފްރޭންކް ވޮރަން ރޮނާލްޑޯއާ ކުރި ސުވާލަކީ، މި ސީޒަންގައި ޕްރިމިއަލީގު ލިބޭނެކަމަށް ރޮނާލްޑޯ ގަބޫލުކުރާ ޓީމަކީ ކޮބައިތޯއާއި، އެ ފުރުސަތު އާސެނަލްއަށް އޮތްކަމަށް ރޮނާލްޑޯއަށް ގަބޫލުކުރެވޭތޯއެވެ. ނަމަވެސް، ސަކަ ގޮތަކަށް ހިނި އައުމަށްފަހު ރޮނާލްޑޯ ބުނީ، އާސެނަލްއަށް ލީގު ނުލިބޭނެ ކަމަށެވެ.

ފަހު މެޗަށް ނިކުންނައިރު މެންޗެސްޓާ ސިޓީ އޮތީ 2 ޕޮއިންޓުގެ ލީޑެއްގައެވެ. އެހެންކަމުން އާސެނަލްއަށް ލީގު ކާމިޔާބުކުރެވޭނީ އެމީހުން އެވަޓަންއާ ބައްދަލު ކުރާ މެޗުން މޮޅުވުމަށްފަހު، ސިޓީ އާއި ވެސްޓްހޭމް ކުޅޭ މެޗުން ސިޓީ މޮޅުނުވެއްޖެނަމައެވެ. ސިޓީ މެޗު އެއްވަރުވިނަމަވެސް، ގޯލު ތަފާތުން ލީގު ލިބޭނީ އާސެނަލްއަށެވެ.