މާލޭ އާ ސަހަރާގައި ނުނިމި ހުރި މަސައްކަތްތައް ނިންމުމަށް އެހެން ކުންފުންޏަކާއި ހަވާލުކޮށްފިއެވެ.

ސިޓި ކައުންސިލުން ބުނީ، އާސަހަރާގައި އަޅަން ފަށާފައިވާ އިމާރާތުގެ މަސައްކަތް ނިންމުމަށް، ހައިމަން ކޮންސްޓްރަކްޝަން ޕްރައިވެޓް ލިމިޓެޑާއި ހަވާލުކޮށްފައިވާ ކަމަށެވެ. އެމަސައްކަތް ހޮނިހިރު ދުވަހު ހަވާލުކޮށްފައި ވަނީ، 2.7 މިލިޔަން ރުފިޔާ އަށެވެ.

އެކުންފުންޏާއި މިމަސައްކަތް ހަވާލުކޮށްފައިވަނީ، 60 ދުވަހުގެ ތެރޭގައި މަސައްކަތް ނިންމާ ގޮތަށެވެ.

މި އެއްބަސްވުމުގައި ހައިމަން ކޮންސްޓްރަކްޝަން ޕްރައިވެޓް ލިމިޓެޑްގެ ފަރާތުން ސޮއެކުރެއްވީ، އެކުންފުނީގެ ޑިރެކްޓަރ މުޙައްމަދު އައިމަންއެވެ. މާލޭ ސިޓި ކައުންސިލްގެ ފަރާތުން އެއްބަސްވުމުގައި ސޮއެކުރެއްވީ، ސެކްރެޓަރީ ޖެނެރަލް ވަޖީހް ނަސީރުއެވެ. މިއެއްބަސްވުމުގައި ސޮއެކުރުމަށް ބޭއްވި ރަސްމިއްޔާތުގައި މާލޭ ސިޓީގެ މޭޔަރު އާދަމް އާޒިމް ބައިވެރިވެވަޑައިގެންނެވިއެވެ.

އާ ސަހަރާގައި ހަދާ އިމާރާތުގެ މަސައްކަތް އެންމެ ފުރަތަމަ ހަވާލުކޮށްފައި ވަނީ، ޕީއެންޕީ މޯލްޑިވްސްއާއެވެ. އެކުންފުންޏަށް މަސައްކަތްތައް ނުނިންމުމުން އެކުންފުންޏާއިއެކު ހަދާފައިވާ އެއްބަސްވުން ވަނީ ބާޠިލްކޮށްފައެވެ.