ރާއްޖޭގެ ހުރިހާ ސްކޫލެއްގެ ކްލާސްރޫމުތަައް 2 އަހަރުގެ ތެރޭގައި އޭސީ ކުރާނެ ކަމަށް ސަރުކާރުން ހާމަކުރައްވާފައި ވާއިރު، އެކަމަށް މަދުވެގެން ބައި ބިލިޔަނަށްވުރެ ގިނަ ރުފިޔާ ހޭދަ ވާނެ ކަމުގައި، ރާއްޖޭގެ ތަޖުރިބާކާރު އިންޖިނޭރު، ޑރ. ޙަސަން ޙަމީދު ވިދާޅުވެއްޖެއެވެ.

ޑރ. ޙަސަން ޙަމީދަކީ، ރާއްޖޭގައި ހުންނެވި އެންމެ ތަޖުރިބާކާރު ބޭފުޅާއެވެ. ތަޢުލީމީ ދާއިރާއަށް ދިގު މުއްދަތެއްގައި ޚިދުމަތް ކުރައްވާފައިވާ، ޑރ. ޙަސަން ޙަމީދު އެމަނިކުފާނުގެ އަމިއްލަ ފުޅު ބުލޮގްގައި ސްކޫލުތަކުގެ ކްލާސް ރޫމްތައް އޭސީ ކުރުމާއި ގުޅޭ ގޮތުން ލިޔުއްވާފައިވާ މަޒުމޫނުގައި ވިދާޅުވީ، އެކަމަށް މަދުވެގެން 600 މިލިޔަން ރުފިޔާ ހޭދަވާނެ ކަމަށާއި، އަދި އޭސީތައް މަރާމާތުކޮށް ބެލެހެއްޓުމާއި، ކަރަންޓްގެ ޚަރަދަށް އަހަރަކަށް، 178 މިލިޔަން ރުފިޔާ ޚަރަދުވާނެ ކަމަށް އަންދާޒާ ކުރެއްވޭ ކަމަށެވެ.

އެހެންކަމުން ޑރ، ޙަސަން ހަމީދު އަންދާޒާ ކުރައްވާފައިވާ ގޮތުން، ކްލާސްރޫމްތައް އޭސީ ކުރުމަށް، މިހާރު ތައުލީމީދާއިރާއަށް ކަނޑައަޅާފައި އޮތް ބަޖެޓުގެ ގާތްގަނޑަކަށް އަށްބައިކުޅަ އެއްބައި ހަމައެކަނި އެކަމަށް ހޭދަވާނެއެވެ. މިހިނގާ އަހަރު ތައުލީމީ ދާއިރާގެ ބަޖެޓުގެ ގޮތުގައި ކަނޑައަޅުއްވާފައި ވަނީ، 4 ބިިލިއަން ރުފިޔާއެވެ.

ޑރ. ޙަސަން ހަމީދު އެމަނިކުފާނުގެ މަޒުމޫނުގައި ވަނީ، ކުލާސް ރޫމުތައް އޭސީ ކުރާނަމަ، އެއާއި ގުޅިގެން، ކުރަންޖެހޭ އިތުރު ގިނަ ޚަރަދުތަކެއް ހުރިކަންވެސް ފާހަގަކުރައްވާފައެވެ. އެގޮތުން ކުލާސް ރޫމުތަކަށް ގެންނަން ޖެހޭ ބަދަލުތަކާއި، ސްކޫލުތަކުގެ ކަރަންޓް ވިއުގައަށް ގެންނަން ޖެހޭ ބަދަލުތައް އެމަނިކުފާނު ފާހަގަ ކުރައްވާފައިވެއެވެ.

މީގެ އިތުރުން، ކްލާސް ރޫމްތައް އޭސީ ކުރުމުން ކުރާނެ ފައިދާ އާއި އަދި އެކަމުން ލިބޭނެ ގެއްލުންތަކާއި ކުރިމަތިވާނެ ގޮންޖެހުންތަކުގެ މައްޗަށްވެސް އެމަނިކުފާނުގެ މަޒުމޫނުގައި އަލިއަޅުއްވާލައްވާފައިވެއެވެ.

ޑރ. ޙަސަން ހަމީދު ލިޔުއްވާފައިވާ މަޒުމޫނު ތިރީފައިވާ ލިންކުން ކިޔުއްވޭނެއެވެ.

https://www.hassanhameed.com