މާލޭގެ އިމާރާތްތަކުންނާއި ބެލްކަނިތަކުން މަގުމައްޗަށް ފެންފައިބާ މަގު ހިނގާ މީހުންނަށް އެކަމުގެ ދަތިތައް ކުރިމަތިވާތީ އެކަން ހައްލުކުރުމަށް، މާލޭ ސިޓީ ކައުންސިލުން އިންސްޕެކްޝަންތައް ފެށުމާއި އެކު، ގ. ދޮންފެހި ގޭގެ ފުރަތަމަ ފަންގިފިލާގެ ފާޚާނާގެ ތަޅުމުގައި އުފެދޭ ފެން އިމާރާތުގެ ފާރު މަގުމައްޗަށް ލޯވަޅެއް އަޅައި މަގަށް ފައިބާ ގޮތަށް ހަދާފައި ހުއްޓައި ފެނިއްޖެއެވެ.

ގަލޮޅު ދޮންފެހި ގެއަކީ، ގަލޮޅު ސަބުދެރިޔާ މަގުގައި ހުންނަ ގެއެކެވެ. އެގޭގެ ފުރަތަމަ ފަންގިފިލާ ހުންނަނީ މަގަށް ވާގޮތަށް ބޭރަށެވެ.

މާލޭ ސިޓީކައުންސިލުން ވިދާޅުވީ، އެކަން ކުރި ފަރާތާއި މެދު ފިޔަވަޅު އަޅައި ޖޫރިމަނާކޮށް، އެކަން ރަނގަޅު ކުރުމަށް އަންގާފައިވާ ކަމަށެވެ. އަދި އާއްމުރައްޔިތުންނަށް އުނދަގޫވާ ގޮތަށް އެފަދަ ކަންކަން ނުކުރުމަށް އިލްތިމާސްކުރާ ކަމަށެވެ.

މާލޭ ސިޓީގެ މޭޔަރު އާދަމް އާޒިމް ވިދާޅުވީ، މާލޭ މަގުމައްޗަށް އެކި އިމާރާތްތަކުން ފެންތިކި ޖަހާ މައްސަލަ އަކީ ޒަމާނުއްސުރެ ހައްލުނުކުރެވި އޮތް މައްސަލަ އެއް ކަމަށެވެ. އަދި އެ މައްސަލަ ހައްލުކުރުމުގެ މަސައްކަތް ހުސްވި ހަފްތާގެ އަންގާރަ ދުވަހުން ފެށިގެން ފަށާފައިވާ ކަމުގައި އާޒިމް ވަނީ ހާމަކުރައްވާފައެވެ. އެގޮތުން މެއި މަހުގެ 14 ވަނަ ދުވަހާއި ހަމައަށް އެކަނިވެސް މަގުމައްޗަށް ފެންތިކި ޖަހާ ގޮތަށް ހުރި 30 ތަނެއް ފާހަނގަ ކޮށް، އެތަންތަން މަރާމާތުކޮށް ރަނގަޅުކުރުމަށް އިމާރާތްތަކުގެ ވެރިފަރާތްތަކަށާއި އެތަންތާނގައި ދިރިއުޅޭ ފަރާތްތަކަށް އަންގާފައިވާ ކަމުގައި އާޒިމް ވިދާޅުވިއެވެ.

މާލޭގެ އިމާރާތްތަކުން މަގުމައްޗަށް ފެންފޭބުމާއި ބެލްކަނީގައި ނުވަތަ ޓެރަހުގައި ހުންނަ ގަސްތަކަށް ފެންދޭއިރު، މަގު ހިނގާ މީހުންނާއި ދުއްވާ މީހުންގެ ބޮލަށް ފެންފައިބާ މައްސަލައާއި، ބެލްކަނިތަކުންނާއި ކުޑަދޮރުތަކުން މަގުމައްޗަށް ކުޅުޖެހުމާއި ހައްޕުޑު އުކުމާއި، ދޮންނަ މެޝިނުން ބޭރުވާ ހަޑިފެންތައް މަގުމައްޗަށް ދޫކޮށްލާ މައްސަލައަކީ މާލޭގައި އެތައް ޒަމާނެއްވީ މައްސަލަތަކެވެ.