މޫސުމާއި ބެހޭ ޤައުމީ އިދާރާއިން، ފުވައްމުލަކާއި އައްޑޫ ސިޓީއަށް ނެރުނު އޮރެންޖް އެލާޓްގެ ވަގުތު މިރޭގެ 23:00 އާއި ހަމައަށް އިތުރުކޮށްފިއެވެ.

މޫސުމާއި ބެހޭ ޤައުމީ އިދާރާއިން ވިދާޅުވީ، އައްޑޫ ސިޓީ އާއި ފުވައްމުލަކަށް މޫސުމް ވަރަށް ގޯސްވާނެ ކަމަށާއި ކަނޑުތައްވެސް ވަރަށް ގަދަވާނެ ކަމަށެވެ. އަދި އެވްރެޖް ގޮތެއްގައި ވައިޖެހޭނެ ކަމަށް ލަފާކުރެވެނީ 34 މޭލާއި 40 މޭލާއި ދެމެދުގެ ބާރުމިނެއްގައި ކަމަށާއި، ވިލާގަނޑުގައި ގަޑިއަކު 55 މޭލަށް ވައި ގަދަވާނެ ކަމުގައި މޫސުމާއި ބެހޭ ޤައުމީ އިދާރާއިން ވިދާޅުވެއެވެ.

މޫސުމާއި ބެހޭ ޤައުމީ އިދާރާއިން، މިއަދު އެންމެ ފުރަތަމަ އައްޑޫ ސިޓީއާއި ފުވައްމުލަކަށް އޮރެންޖް އެލާޓް ނެރެފައި ވަނީ، މިއަދުގެ މެންދުރުފަހު 3:00 އިން ފެށިގެން އިރުއޮއްސި 7:00އަށެވެ. 

ރާއްޖޭގެ މޫސުމް ގޯސްވެ ބ އަތޮޅުން ފެށިގެން ދެކުނުގެ ހުރިހާ އަތޮޅަކަށް މިރޭގެ 22:30 އާއި ހަމައަށް ޔެލޯ އެލާޓް ނެރެފައި ވާއިރު، އެންމެ އުތުރުގެ އަތޮޅުތަކަށް ވަނީ ވައިޓް އެލާޓް ނެރެފައެވެ.

މިދުވަސްވަރު ރާއްޖޭގެ މޫސުމް ވަަރަށް ބޮޑަށް ގޯސްވެފައި ވާތީ، ރޭނގަނޑު ކަނޑުދަތުރުފަތުރު ނުކުރުމަށް ކަމާއި ބެހޭ ފަރާތްތަކުން ވަނީ އިލްތިމާސްކޮށްފައެވެ.