ރާއްޖެއަށް މިހާރު ކުރަމުންދާ ވިއްސާރައިގައި ދެކުނުގެ އަތޮޅުތަކަށް އިތުރަށް މޫސުމް ގޯސްވެ، އައްޑޫ ސިޓީއާއި ފުވައްމުަލަކަށް މޫސުމާއި ބެހޭ ޤައުމީ އިދާރާއިން އޮރެންޖް އެލާޓް ނެރެފިއެވެ.

މޫސުމާއި ބެހޭ ޤައުމީ އިދާރާއިން އައްޑޫ ސިޓީއާއި ފުވައްމުލަކަށް އޮރެންޖް އެލާޓް ނެރެފައި ވަނީ، މިއަދުގެ މެންދުރުފަހު 3:00 އިން ފެށިގެން އިރުއޮއްސި 7:00އަށެވެ. މެޓް އޮފީހުން ވިދާޅުވީ، އައްޑޫސިޓީއަށް އާއްމު ގޮތެއްގައި 34 މޭލާއި 40 މޭލާއި ދެމެދުގެ ބާރު މިނެއްގައި ވައިޖެހޭނެ ކަމަށާއި، ކޮޅިގަނޑުގައި ގަޑިއަކު 60 މޭލަށް ވައިގަދަވާނެ ކަމަށް ލަފާ ކުރެވޭ ކަމަށެވެ.

އަދި ކަނޑުތައް ވަރަށް ގަދަވާނެ ކަމަށްވެސް މޫސުމާއި ބެހޭ ޤައުމީ އިދާރާއިން ވަނީ ވިދާޅުވެފައެވެ.

މީގެ އިތުރުން ބ. އަތޮޅުން ފެށިގެން ރާއްޖޭގެ ދެކުނުގެ ހުރިހާ އަތޮޅަކަށް، މިއަދުގެ ހަވީރު 5:30 އާއި ހަމައަށް މޫސުމާއި ބެހޭ ޤައުމީ އިދާރާއިން ވަނީ، ޔެލޯ އެލާޓް ނެރެފައެވެ. އަދި މެދު ރާއްޖެތެރޭގެ ސަރަހައްދުތަކަށްވެސް ގަޑިއަކު، 28 މޭލާއި 35 މޭލާއި ދެމެދުގެ ބާރު މިނެއްގައި އާއްމު ގޮތެއްގައި ވައިޖެހެމުންދާނެ ކަމުގައި މޫސުމާއި ބެހޭ ޤައުމީ އިދާރާއިން ވަނީ ވިދާޅުވެފައެވެ.

ރާއްޖެއަށް މޫސުމް ގޯސްވެފައިވާތީ. ޚާއްޞަ ގޮތެއްގައި ރޭެގަނޑު ކަނޑުދަތުރުފަތުރު ނުކުރެއްވުމަށް މޫސުމާއި ބެހޭ ޤައުމީ އިދާރާއިން ވަނީ އިލްތިމާސްކޮށްފައެވެ.