ދިރާސީ އައު އަހަރު ފެށެން ހަފްތާއަކަށް ވެފައި ވާއިރު، ދަރިވަރުންގެ ޓެކްސްޓް ފޮތްތައް ނުލިބޭ ކަމުގެ ޝަކުވާ ބޮޑުވެއްޖެއެވެ.

މާލެއާ ހުޅުމާލޭގެ ބައެއް ސަރުކާރު ސްކޫލުތަކުގެ ޕްރިންސިޕަލުންވެސް ވިދާޅުވީ، އައު ދިރާސީ އަހަރަށް ބޭނުންވާ ޓެކްސްޓް ފޮތްތައް ދަރިވަރުންނަށް ދޫކުރަން ނުފެށޭ ކަމަށާއި، ފޮތްތައް ހަމަޔަށް ނުލިބޭ ކަމަށެވެ. އަތޮޅުތެރޭގެ ބައެއް ސްކޫލުތަކުގެ ޕްރިންސިޕަލުން، "ނޫން.އެމްވީ"އަށް މައުލޫމާތު ދެއްވަމުން ވިދާޅުވީ، ދިރާސީ އައު އަހަރުގެ ކިޔެވުން މެއި 26 ގައި ފެށުމަށް ހަމަޖެހިފައި ވާއިރު، މިހާތަނަށް ޓެކްސްޓް ފޮތްތައް ލިބިފައި ނުވާ ކަމަށެވެ. އެހެން ނަމަވެސް ކުރީ އަހަރުތަކެކޭ އެއްފަދައިން ދިރާސީ އަހަރު ނިމުމުގެ ކުރިން ދަރިވަރުންގެ އަތުން އަނބުރާ ނެގުމަށް ހަމަޖައްސާފައި ހުރި ޓެކްސްޓް ފޮތްތައް ސްކޫލުތަކުން ނަގާފައިވާ ކަމުގައި ޕްރިންސިޕަލުން ވިދާޅުވިއެވެ.

އަތޮޅުތެރޭގެ ބައެއް ސްކޫލުތަކުގެ ޕްރިންސިޕަލުން ވިދާޅުވީ، ދިރާސީ އައު އަހަރު ފެށޭ އިރުވެސް ޓެކްސްޓް ފޮތްތައް ލިބޭނެ ކަމުގެ އުއްމީދެއް ނެތް ކަމަށެވެ. އަދި ސްކޫލު ހުޅުވޭއިރު، ފޮތްތައް ކުދިންނަށް ހަވާލުކުރެވިފައި ނެތުމަކީ، އެކަމުގެ ސަބަބުން މުދައްރިސުންނާއި ދަރިވަރުންނަށްވެސް އަދި ބެލެނިވެރިންނަށްވެސް އިތުރު ތަކްލީފުތަކެއް އުފުލަން ޖެހޭ ކަމެއްކަން ޕްރިންސިޕަލުން ފާހަގަކުރެއްވިއެވެ.

މިނިސްޓްރީ އޮފް އެޑިޔުކޭޝަނުން ވިދާޅުވީ، ސްކޫލުތަކަށް ޓެކްސްޓް ފޮތްތައް ފޮނުވުމުގެ މަސައްކަތް ކުރަމުންދާ ކަމަށެވެ. އެހެން ނަމަވެސް ނިމިދިޔަ ދިރާސީ އަހަރު ސްކޫލުތަކުން ރިޕޯޓްފޮތް ދޫކުރުމުގެ ކުރިން ޓެކްސްޓް ފޮތްތައް ދޫނުކުރެވުނު ސަބަބެއް އެމިނިސްޓްރީން ހާމައެއް ނުކުރެއެވެ.

ނިމިދިޔަ ދިރާސީ އަހަރާއި އޭގެ ކުރީގެ ދިރާސީ އަހަރުގައިވެސް، ބޮޑު ޗުއްޓީއަށް ސްކޫލުތައް ބަންދު ކުރުމުގެ ކުރިން ގްރޭޑް ބަދަލުވި ދަރިވަރުންނަށް، ޓެކްސްޓް ފޮތްތައް ސްކޫލުތަކުން ދޫކުރަން ފަށައެވެ.

މިސަރުކާރުން ވަނީ، ދިރާސީ އަހަރުގެ ކަލަންޑަރަށް ބަދަލު ގެނެސް ދިރާސީ އަހަރުގެ މުއްދަތު ކުރުކޮށްލާފައެވެ. އެއާއެކު ކިޔަވައިދިނުމާއި އެއާއި ގުޅުންހުރި އެހެން ކަންކަމަށްވެސް އެކަމުގެ އަސަރުތައް ވަނީ ފޯރާފައެވެ.