ސީ ޕްލޭން އެއާ އެމްބިއުލާންސް --
ކަނޑޫދޫގައި ފާރެއް ދަށުވި ކުޑަކުއްޖާ އިތުރު ފަރުވާއަށް މާލެ ގެނެސްފި
އިއްޔެ އިރު އޮއްސުނު ވަގުތު، ތ. ކަނޑޫދޫގައި ވެއްޓުނު ފާރެއްގެ ދަށުވެ ޒަޚަމްވި 10 އަހަރުގެ ކުޑަކުއްޖާ، އިތުރު ފަރުވާއަށް މާލެ ގެނެސްފިއެވެ.
ކަނޑޫދޫ ކައުންސިލްގެ ރައީސް އަހުމަދު ރީހާން ވިދާޅުވީ، ޒަޚަމްވި ކުޑަކުއްޖާ މާލެއަށް ފުރުވާލެވިފައި ވަނީ، ސީޕްލޭން އެއާ އެމްބިއުލާންސްގައި މިއަދު ހެނދުނު 8:30 ހާއިރުގައި ކަމަށެވެ.
ކަނޑޫދޫއިން މައުލޫމާތު ދިން ބައެއް މީހުން ބުނެފައިވާ ގޮތުގައި ދުވަސްވީ އެފާރު ވެއްޓުނު ކަމަށް ބެލެވެނީ ވައިގަދަ ވެގެންނެވެ.
ކަނޑޫދޫ ކައުންސިލްގެ ރައީސް އަހުމަދު ރީހާން ވިދާޅުވީ، ވެއްޓުނު ފާރަކީ މީހުން ދިރިއުޅޭ ގެއެއްގެ މަގު ފާރު ކަމަށާއި އެއީ ތެޅިގަލުން ތިރީބައި ރާނައި އަދި މަތީބައި އެޅިގަލުން ރާނާފައި ހުރި ދުވަސްވީ ފާރެއް ކަމަށެވެ. ކުޑަކުއްޖާ ފާރުގެ ދަށުގައި ވީ އެފާރު ވެއްޓުނީ އެވަގުތު އެކުއްޖާ އެމަގުން ހިނގާފައި ދަނިކޮށެވެ. ފާރު ވެއްޓުނު ހާދިސާގައި، ކުއްޖާގެ ބޯ ފިޔަވައި މުޅި ހަށިގަނޑު ފާރުގެ ދަށުވި ކަމަށާއި ކުއްޖާގެ ހާލު ރަނގަޅު ނޫން ކަމުގައިވެސް ރީހާން ވިދާޅުވިއެވެ.
ކުޑަކުއްޖާ މާލެ ގެނައުން ލަސްވީ، މޫސުމްގޯސް ކަމުން ދަތުރު ނުކުރެވިގެންނެވެ. އެހެންވެ މިއަދު ހެނދުނު އިރު އެރުމާއި އެކު ސީޕްލޭން އެއާ އެމްބިއުލޭންސް ކަނޑޫދޫއަށް ފޮނުވައި، ސަރުކާރުން ވަނީ އެކުޑަ ކުއްޖާ އިތުރު ފަރުވާއަށް މިއަދު ހެނދުނު މާލެއަށް ގެނެސްދީފައެވެ.