ތިލަފުށިން ފުރައިގެން މުލަކަތޮޅު މެދުފުށި އައިލެންޑް ރިސޯޓަށް ދަތުރި މުދާ އުފުލާ ދޯންޏެއް ގެއްލުގެން އެދޯނި ހޯދުމުގެ މަސައްކަތް ފަށައިފިއެވެ.

އެމްއެންޑީއެފް އިން ވިދާޅުވީ، ކ.ތިލަފުށިން ފުރައިގެން މ.މެދުފުށި އައިލެންޑް ރިޒޯޓަށް ދަތުރުކުރަމުންދިޔަ “AAA-37” ނަމަކަށް ކިޔާ މުދާ އުފުލާ ދޯންޏެއްގެ ޚަބަރެއް ނުވެގެން، އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ރިޕޯޓްކޮށްފައި ވަނީ އިއްޔެ ހަވީރު 17:20 ހާއިރުގައި ކަމަށެވެ.

އެ ދޯނި ތިން މީހުންނާއި އެކު އިއްޔެ ކ. ތިލަފުށިން ފުރާފައި ވަނީ ހެނދުނު، 6:00 ގައެވެ. އެމްއެންޑީއެފުން ވިދާޅުވީ، އެދޯނި ހޯދުމުގެ މަސައްކަތުގައި،  އެމްއެންޑީއެފް ކޯސްޓްގާޑް ޝިޕް ޝަހީދު ޢަލީ ހަރަކާތްތެރިވަމުންދާ ކަމަށެވެ.

މި ދުވަސްވަރަކީ، ރާއްޖެއަށް މޫސުމްގޯސް އަދި ވައިގަދަ ކަނޑުތައް ގަދަ ދުވަސް ވަރަކަށް ވާތީ މޫސުމަށް ބަލައިގެން ދަތުރު ކުރެއްވުމަށް ކަމާއި ބެހޭ ފަރާތްތަކުން ވަނީ އިލްތިމާސް ކުރައްވާފައެވެ.