މިއަދު އިރު އޮއްސުނު ވަގުތު، ތ. ކަނޑޫދޫގައި ވެއްޓުނު ފާރެއްގެ ދަށުވެ 10 އަހަރުގެ ކުޑަކުއްޖަކު ޒަޚަމްވެއްޖެއެވެ.

ކަނޑޫދޫ ކައުންސިލްގެ ރައީސް އަހުމަދު ރީހާން ވިދާޅުވީ، ޒަޚަމްވި ކުޑަކުއްޖާ މިވަގުތު އޮތީ ކަނޑޫދޫ ސިއްޙީ މަރުކަޒުގައި ކަމަށެވެ. މިވަގުތު މޫސުމް ގޯސްވުމުގެ ސަބަބުން އެކުޑަކުއްޖާ އިތުރު ފަރުވާއަށް އަތޮޅު ހޮސްޕިޓަލަށް އަދި ރަށުން ބޭރަށް ގެންދިޔުމަށްވެސް ދަތިވެފައިވާ ކަމުގައި އޭނާ ވިދާޅުވިއެވެ.

ރީހާން ވިދާޅުވީ، ވެއްޓުނު ފާރަކީ މީހުން ދިރިއުޅޭ ގެއެއްގެ މަގު ފާރު ކަމަށާއި އެއީ ތެޅިގަލުން ތިރީބައި ރާނައި އަދި މަތީބައި އެޅިގަލުން ރާނާފައި ހުރި ދުވަސްވީ ފާރެއް ކަމަށެވެ. ކުޑަކުއްޖާ ފާރުގެ ދަށުގައި ވީ އެފާރު ވެއްޓުނީ އެވަގުތު އެކުއްޖާ އެމަގުން ހިނގާފައި ދަނިކޮށެވެ. ފާރު ވެއްޓުނު ހާދިސާގައި، ކުއްޖާގެ ބޯ ފިޔަވައި މުޅި ހަށިގަނޑު ފާރުގެ ދަށުވި ކަމަށާއި ކުއްޖާގެ ހާލު ރަނގަޅު ނޫން ކަމުގައިވެސް ރީހާން ވިދާޅުވިއެވެ.

ކަނޑޫދޫއިން ވާހަކަ ދެއްކި އެހެން މީހަކު ބުނީ، އެފާރު ވެއްޓުނީ ގަދަވައިގެ ސަބަބުން ކަމުގައި ބެލެވޭ ކަމަށެވެ. އަދި މިވަގުތުވެސް ވަރަށް ވައިގަދަވެފައި ވިއްސާރަ ކަމަށާއި، ކަނޑު އުޅަނދެއްގައި ފުރޭވަރު ނުވާކަމުގައިވެސް އޭނާ ވިދާޅުވިއެވެ.