ޓްރެފިކް ޤަވާއިދާއި ޚިލާފަށް ސިނަމާލެ ބުރިޖުގައި، ހެލްމެޓް ނާޅައި ދުުއްވި ދެމީހަކު ހޯދައި ޖޫރިމަނާކޮށް ފިޔަވަޅުއަޅާފައިވާ ކަމުގައި ފުލުހުންގެ އިދާރާއިން ބުނެފިއެވެ.

ފުލުހުންގެ އިދާރާގެ ސަމާލުކަމަށް މިކަން އައިސްފައި ވަނީ އެދެމީހުން ޓްރެފިކް ޤަވާއިދާއި ޚިލާފަށް ހެލްމެޓް ނާޅާއި ސިނަމާލެ ބުރިޖާއި ހައިވޭ މަތިން ދަތުރުކުރާ ވީޑިއޯއެއް އާއްމު މީހަކު ސޯޝަލް މީޑިއާގައި ޕޯސްޓްކޮށް އެވީޑިއޯ ދައުރުކުރަން ފެށުމުންނެވެ.

ފުލުހުންގެ އިދާރާއިން ވިދާޅުވީ، ސައިކަލް ދުއްވި މީހާ އާއި އެއުޅަނދުގެ ފަހަތުގައި އިންމީހާވެސް ހޯދައި އެމީހުން ޖޫރިމަނާކޮށްފައި ވާކަމަށެވެ. މީގެއިތުރުން ފުލުހުން ވަނީ، ސަލާމަތާއި ރައްކާތެރިކަމަށް ހެދިފައިވާ ޤާނޫނުތަކާއި ޤަވާއިދުތަކަށް ހުރިހާ ފަރާތްތަކަކުންވެސް ބޯލެނބުމަށް އިލްތިމާސްކޮށްފައެވެ.

ސޯޝަލް މީޑިއާގައި މީހަކު އާއްމުކުރި އެ ވީޑިއޯއިން ފެންނަ ގޮތުގައި، ހެލްމެޓް ނާޅައި ސިނަމާލެ ބުރިޖާއި، ހައިވޭގައި ދަތުރުކޮށްފައި ވަނީ، ބިދޭސީ އަންހެނަކާއި ދިވެހި ފިރިހެނެކެވެ. އެހެން ނަމަވެސް އެމީހުންނާއި ގުޅޭ ގޮތުން ފުލުހުން ތަފްސީލެއް ހާމައެއް ނުކުރެއެވެ.