ސަރުކާރުން އަލަށް ކަނޑައެޅި ޓެކްސީ އަގުތަކުގެ ތެރޭގައި، ސީޕްލޭން ޓަރމިނަލްއިން ކުރާ ދަތުރުތައް ހިމަނާފައި ނުވާކަމުގައި ޓެކްސީ ޑްރައިވަރުން ބުނެފިއެވެ.

ޓެކްސީ ޑްރައިވަރުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި ޓެކްސީ ޑްރައިވަރުން ބުނީ، މެއި 14 ވަނަ ދުވަހު ޓްރާންސްޕޯޓު މިނިސްޓްރީން އަގުތައް ރިވައިސްކޮށް އިއުލާނުކުރި އިރުވެސް ޓީއެމްއޭއިން ކުރާ ދަތުރު (ސީޕްލޭން ޓަރމިނަލުން ކުރާ ދަތުރު)ގެ އަގު ކަނޑައަޅާފައި ނުވާ ކަމަށެވެ. އެެހެންވެ އެ ދަތުރުތަކަށް ޓެކްސީތަކުން އަމިއްލަ އަގެއް ނެގުމަކީ ޓެކްސީ ޑްރައިވަރުންގެ މައްސަލައެއްތޯ އޭނާ ވަނީ ސުވާލުކޮށްފައެވެ.

އޭނާ ބުނީ ސަރުކާރުން ކުރަންޖެހޭ ކަމެއް ނުކޮށް ދޫކޮށްލީމާ އެކަމުގެ ސަބަބުން ފިތުނަވެރިކަން އުފެދެމުންދާކަމަށެވެ. މީގެ އިތުރުން އެޓެކްސީ ޑްރައިވަރު ވަނީ، އާއްމުން ޓެކްސީ ޑްރައިވަރުންނާއި މެދު އަދި ޓެކްސީ ޚިދުމަތާއި މެދު ފާޅުކުރާ ޝުއޫރުތަކަކީ ސަރުކާރުން ކުރުވާ ކަމެއްގެ ގޮތުގައިވެސް ތުހުމަތުކޮށްފައެވެ.

ޓްރާންސްޕޯޓު މިނިސްޓްރީން ވަނީ، ގްރޭޓާ މާލެ ސަރަހައްދުގައި ހަތަރު ފުރޮޅުލީ އުޅަނދުތަކުގައި ޓެކްސީ ކުރުމުގެ އަގުތައް ކަނޑައަޅައި އެއަގުތަކަށް 20 މެއި 2024 ވަނަ ދުވަހުން ފެށިގެން އަމަލުކުރަން ފަށާނެކަން އިއުލާނުކޮށްފައެވެ.

މިގޮތުން ޓްރާންސްޕޯޓް މިނިސްޓްރީ އިއުލާނުކޮށްފައިވާ އަގުތައް ދިވެހި ސަރުކާރުގެ ގެޒެޓުގައި ވަނީ ޝާއިއުކޮށްފައެވެ.