ސަރުކާރުން ނުކުރާ ވިޔަފާރިއަކީ، ޓެކްސީގެ ވިޔަފާރި ކަމަށާއި އެހެނަސް މިހާރު އެމްޓީސީސީ ބޭނުންކޮށްގެން ސަރުކާރުން އެވިޔަފާރީގެ ތެރެއަށް ވަދެފައިވާ ކަމުގައި ޓެކްސީ ޑްރައިވަރުން ބުނެފިއެވެ.

ބައެއް ޓެކްސީ ޑްރައިވަރުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި، ޓެކްސީ ޑްރައިވަރެއް ކަމުގައިވާ، އިބްރާހިމް ޝަމީމް ބުނީ، ސަރުކާރުން ކުރާކަމަކީ، ޓެކްސީ ޑްރައިވަރުންނަށް އާއްމުންނަށް ޚިދުމަތް ދިނުން ދަތިކޮށް ޖެއްސުން ކުރުން ކަމަށެވެ. އަދި ޓެކްސީގެ ޚިދުމަތުގެ ތެރެއަށް ސަރުކާރުން ވަނުމަކީ ބަލައިގަނެވޭނެ ކަމެއް ނޫންކަމުގައި އޭނާ ބުންޏެވެ. އޭނާ ބުނީ ޓެކްސީގެ ޚިދުމަތާއި ގުޅޭ ގޮތުން މިހާރު އުފެދިފައިވާ ހިތްހަމަނުޖެހުންތަކާއި ގުޅިގެން ޓްރާންސްޕޯޓް މިނިސްޓްރީއާއި އެކު އެކިފެންވަރުގައި ދިޔައީ މަޝްވަރާކުރަމުން ކަަމަށެވެ.

ޓެކްސީ ޑްރައިވަރުންގެ މައިގަނޑު ޑިމާންޑަކީ، ޚިދުމަތުގެ ދަތުރުތަކުގެ އަގުތައް ބޮޑު ކުރުމެވެ. ޚާއްޞަކޮށް 6 މީހުންނަށްވުރެ ގިނައިން އުފުލޭ އުޅަނދުތަކުގައި ދަތުރުކުރުމަށް ނަގާ އަގު ސަރުކާރުން %40 ކުޑަކޮށްފައިވާ ކަމަށްވެސް ޝަމީމް ވަނީ ބުނެފައެވެ.

ޝަމީމް މިހެން ބުނި ނަމަވެސް މީގެ ހަފްތާއެއްގައި ދުވަސްކުރިން ސަރުކާރުން އެއާޕޯޓުގައި ފިޔަވަޅުތައް އެޅީ، ޓެކްސީ ކުރާ ފަރާތްތަކުން ސަރުކާރުން ކަނޑައަޅާފައިވާ އުސޫލުތަކާއި ޚިލާފަށް ޢަަމަލުކުރުން އާއްމުވެ އާއްމުންގެ ޝަކުވާތައް ބޮޑުވެފައިވާތީ އެޅި ފިޔަވަޅެކެވެ.

އަދި ސަރުކާރުން ހުޅުލޭ އެއާޕޯޓު ޓެކްސީ ކިއޫއަށް ގެނައި ބަދަލުތަކާއި ދެކޮޅު ހެދުމުގެ ގޮތުން ބައެއް ޓެކްސީ ޑްރައިވަރުން، ދަތުރުތައް ކުރުމަށް އެއާޕޯޓަށް ވަނުން ހުއްޓާލިއެވެ. އަދި އެކަމުގެ ސަބަބުން އާއްމުންނަށް އިތުރު އުނދަގޫތަކާއި ކުރިމަތިލާން ޖެހުމުގެ ސަަބަބުން އެމްޓީސީސީން ކުރާ ވޭން ދަތުރުތައް އެއާޕޯޓުގައި ވަނީ އިތުރުކޮށްފައެވެ.

ޓެކްސީ ޑްރައިވަރުން ވަނީ، މިމަހުގެ 14 ވަނަ ދުވަހު ޓްރާންސްޕޯޓު މިނިސްޓްރީން އިއުލާނު ކުރި އަގުތައް ބަލައި ނުގަންނަ ކަމަކަށެވެ.