ރޭ ކުރި ވިއްސާރައިގައި ގެއްލުން ލިބުނު ފަރާތްތަކަށް އެހީދިނުމުގެ މަސައްކަތް ކުރަމުންދާކަމުގައި، ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެން.ޑީ.އެމް.އޭ) އިން ވިދާޅުވެއްޖެއެވެ.

އެ އޮތޯރިޓީން ވިދާޅުވީ، ވިއްސާރައިގައި ރަށްތަކަށް ލިބުނު ގެއްލުންތައް ދެނެގަނެ، އެހީތެރިކަން ބޭނުންވާ ފަރާތްތަކަށް އެހީތެރިވެދިނުމުގެ މަސައްކަތް އެން.ޑީ.އެމް.އޭ އާއި ރަށު ކައުންސިލްތަކާއި ގުޅިގެން މިހާރު ކުރަމުންދާ ކަމަށެވެ. 

ރާއްޖެއަށް މިހާރު ކުރަމުންދާ ވިއްސާރައިގައި ރާއްޖޭގެ ބައެއް ރަށްރަށަށް ރޭ ވަނީ ގެއްލުންތައް ލިބިފައެވެ. މިގޮތުން ރޭ ފަތިހު، ހއ. ދިއްދޫއަށް ނަގޫރޯޅިއެއް އެރުމުގެ ސަބަބުން އެރަށުގެ 10 ގެއެއްގެ ފުރާޅަށް ގެއްލުން ލިބުނު އިރު، 6 ގެއެއްގެ ފުރާޅުވަނީ އެއްކޮށް އެއްލާލާފައެވެ. އެގެތަކުގައި ދިރިނޫޅެވޭ ވަރު ވެފައިވާތީ، އެގެތަކުގައި ދިރިއުޅުނު މީހުން ވަނީ ވަގުތީ ގޮތުން އާއިލީ އެހެން މީހުންގެ ގެތަކަށް ބަދަލުވެފައެވެ.

އެންޑީއެމްއޭއިން ވިދާޅުވީ، ރޭކުރި ވިއްސާރައިގައި ކޮޅުމަޑުލު ތިމަރަފުށީގައިވެސް ވަރަށް ބޮޑަށް ފެންބޮޑުވެފައިވާ ކަމަށެވެ. މިގޮތުން ފެންބޮޑުވުމުގެ ސަބަބުން ތިމަރަފުށީގެ 33 ގެއަކަށް ފެންވަދެ އެކިވަރުގެ ގެއްލުންތައް ލިބިފައިވާ ކަމުގެ ރިޕޯޓްތައް ލިބިފައިވާ ކަމުގައިވެސް އެން.ޑީ.އެމް.އޭއިން ވިދާޅުވެފައިވެއެވެ.