އިންޑިއާ ސަރުކާރުން ރާއްޖެއަށް ހަދިޔާކޮށްފައިވާ ހެލިކޮޕްޓަރެއް ހުއްދަ ނެތި ތިމަރަފުއްޓަށް ޖައްސާފައިވާ ކަމަށް ބުނެ، މިހާރުގެ ޑިފެންސް މިނިސްޓަރ ޣައްސާނު މައުމޫނު ދެއްކެވި ވާހަކަފުޅު އިންޑިއާއިން ދޮގުކޮށްފިއެވެ.

މިދިޔަ ހޮނިހިރު ދުވަހު، ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ޑިފެންސް މިނިސްޓަރ ޣައްސާނު މައުމޫނު ވިދާޅުވީ، އިންޑިއާ ސިފައިން ދުއްވާ ހެލިކޮޕްޓަރު ހުއްދަ ނުހޯދައި ތިމަރަފުއްޓަށް ޖައްސާފައިވާ ކަމަށެވެ. އަދި މަޖިލީހުގެ 241 ކޮމިޓީގައި އެމައްސަލަ ބަލާފައިވާ ކަމަށްވެސް ވިދާޅުވިއެވެ. އެހެން ނަމަވެސް އެކަމާއި ގުޅޭ ގޮތުން މިނިސްޓަރ ޣައްސާނު އިތުރު މައުލޫމާތެއް ނުދެއްވައެވެ.

ޑިފެންސް މިނިސްޓަރ ޣައްސާނު މައުމޫނު ދެއްކެވި ވާހަކަފުޅު ދޮގުކޮށް، ރާއްޖޭގައި ހުންނަ އިންޑިއާ އެމްބަސީން ވަނީ ބަޔާނެއް ނެރެފައެވެ. އިންޑިއާ އެމްބަސީން ހާމަކޮށްފައިވާ މައުލޫމާތު އެނގޭ ގޮތުގައި ޣައްސާނު އިޝާރާތްކޮށްފައި ވަނީ އިމާޖެންސީ ޙާލަތެއްގައި ހެލިކޮޕްޓަރު 09 އޮކްޓޫބަރު 2019ގައި ތިމަރަފުށީ އެއާޕޯޓުގައި ޖެއްސި ހާދިސާއަށެވެ. އެކަމާއި ގުޅިގެން އިންޑިއާ އެމްބަސީން ބުނީ އެދުވަހުވެސް ހެލިކޮޕްޓަރު ތިމަރަފުށީގައި ޖައްސާފައި ވަނީ، އެކަމާއި ގުޅޭ ހުރިހާ ހުއްދަތަކެއް ހޯދުމަށް ފަހުގައި ކަމަށްވެސް އެމްބަސީން ބުނެފައިވެއެވެ. އަދި އޭގެ އިތުރުން އެއްވެސް އިންޑިއާ އެމްބަސީން ބުނެފައި ވަނީ، އިންޑިއާގެ ޕްލެޓްފޯމްތަކުގައި ހަރަކާތްތެރި ވަނީ އަބަދުވެސް ދެޤައުމުގެ ދެމެދުގައި އެއްބަސްވެވިފައިވާ ގޮތަށް ނަގަންެހޭ ހުއްދަތައް ނަގައިގެން ކަމަށެވެ.

އިންޑިއާ ސިފައިން ރާއްޖެއިން ފޮނުވާލި އިރު، ދިވެހި ސަރުކާރަށް ރާއްޖޭގައި ތިބޭ އިންޑިއާ ސިފައިންގެ މައްޗަށް ކޮންޓްރޯލެއް ނޯންނަކަމަށް ދޭހަވާ މޭރުމަކުން ޑިފެންސް މިނިސްޓަރ ވަނީ ވާހަކަފުޅު ދައްކަވާފައެވެ.