މިހިނގާ މެއިމަހުގެ  5 ވަނަ ދުވަހު ހުޅުމާލޭގައި ހިނގި އެކްސިޑެންޓެއްގައި މީހަކު މަރުވި މައްސަލައެއް ބަލަމުންދާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ހާދިސާ ހިނގިތާ 10 ދުވަސްފަހުން ފުލުހުން މީޑިއާއަށް ހިއްޞާކުރި މައުލޫމާތުގައި ބުނެފައި ވަނީ، އެ އެކްސިޑެންޓް ހިނގާފައި ވަނީ މެއި މަހުގެ 5 ވަނަ ދުވަހުގެ 3:26 ހާއިރު ހުޅުމާލޭ އެމް.ދަޑަބުލިޔު.އެސް.ސީ އިމާރާތް ކައިރިން ކަމަށެވެ. އަދި އެކްސިޑެންޓް ހިނގާފައި ވަނީ އެމީހާ ދުއްވި ސައިކަލް ކަހާލައިގެން ވެއްޓުމުގެ ސަބަބުން ކަމުގައި ފުލުހުން ވިދާޅުވެފައިވެއެެވެ.

ފުލުހުންގެ އިދާރާއިން ވިދާޅުވީ އެމީހާ ނިޔާވީ، ހުޅުމާލެ ހޮސްޕިޓަލްގައި ފަރުވާ ދިނުމަށްފަހުގައި އިތުރުފަރުވާއަށް އޭޑީކޭ ހޮސްޕިޓަލަށް ބަދަލުކޮށް އެ ހޮސްޕިޓަލުގައި ފަރުވާ ދެމުން ދަނިމޮށް މެއި 6 ވަނަދުވަހުގެ ރޭ 00:50 ހާއިރުގައި ކަމަށެވެ. ހާދިސާގައި ނިޔާވެފައި ވަނީ އުމުރުން 36 އަހަރުގެ ދިވެހި ފިރިހެނެއް ކަމުގައިވެސް ފުލުހުންގެ އިދާރާއިން ވިދާޅުވެފައިވެއެވެ.

ފުލުހުންގެ އިދާރާއިން މިއަދު ވިދާޅުވީ އެ އެކްސިޑެންޓްގެ މައްސަލަ ފުލުހުން ތަޙްޤީޤުކުރަމުން ގެންދާ ކަމަށެވެ.