ރޭ ފަތިހު ހއ. ދިއްދޫއަށް ނަގޫ ރޯޅިއެއް އަރައި ބޮޑެތި ގެއްލުންތަކެއް ލިބިއްޖެއެވެ.

ދިއްދޫ ކައުންސިލްގެ ރައީސް ޢަބުދުﷲ ރަޝީދު ވިދާޅުވީ، ރޭ އެރި ނަގޫ ރޯޅީގައި 6 ގެއެއްގެ ފުރާޅު އެއްލާލާފައިވާ ކަމަށާއި، އެގެތަކުގެ ފުރާޅުއެޅުމުގެ މަސައްކަތް ކައުންސިލުން ކުރަމުންދާ ކަމަށެވެ. ރޭގެ ހާދިސާގައި އެއްވެސް މީހަކަށް ގެއްލުމެއް ނުލިބުނު ނަމަވެސް ގެތަކަށާއި މުދަލަށް ބޮޑެތި ގެއްލުންތަކެއް ލިބުނެވެ.

ނަގޫރޯޅި އަރާފައި ވަނީ އެރަށުގައި މީހުން އަލަށް އާބާދުވެ މީހުން ދިރިއުޅެން ފަށާފައިވާ ގެތަކުގައެވެ. މިގޮތުން މީގެ 7 އަހަރު ކުރިން މީހުން ދިރިއުޅެންފެށި އެގެތަކުގެ ފުރާޅު އެއްްލާލުމުން މިހާރު އެމީހުން ވަގުތީ ގޮތުން ދިރިއުޅެނީ އާއިލީ އެހެން ގެތަކުގައި ކަމުގައި ރަޝީދު ވިދާޅުވިއެވެ.

ޢަބުދުﷲ ރަޝީދު ވިދާޅުވީ، މިއަދު ކުރަމުންދަނީ ގެތަކުގައި އަލުން މީހުން ދިރިއުޅެވޭ ވަރުކުރުމަށްޓަކައި ކުރަންޖެހޭ މަރާމާތުތަކާއި ފުރާޅުތައް އެޅުމުގެ މަސައްކަތް ކަމަށެވެ. އަދި ހާދިސާއާއި ބެހޭ މައުލޫމާތު ނޭޝަނަލް ޑިޒާސްޓަރ މެނޭޖްމެންޓް ސެންޓަރާއި ހިއްސާކޮށްފައިވާ ކަމަށާއި، ލިބުނު ގެއްލުންތައް ސަރވޭ ކުރުމުގެ މަސައްކަތް މާދަމާއިން ފެށިގެން ފަށާނެ ކަމުގައިވެސް އޭނާ ވިދާޅުވިއެވެ.

މިހާރު ރާއްޖެއަށް ކުރަމުންދާ ވިއްސާރައިގައި ރާއްޖޭގެ ބައެއް ސަރަހައްދުތަކަށް ވަރަށް ބޮޑަށް މޫސުމް ގޯސްވެ ފެންބޮޑުވުމުގެ ހާދިސާތައްވެސް ވަނީ ހިނގާފައެވެ.