ސިފައިންގެ އާއިލާތައް ދިރިއުޅުމަށް ޚާއްޞަކޮށްފައިވާ، ބަނޑޭރިކޮށީގައި ހުރި ފަޅު ގެއެއްގެ ތެރޭގައި މަރުވެފައި އޮއްވައި ފެނުނު މީހާގެ ހަށިގަނޑު ޕޯސްޓް މޯޓަމް ހެދުމަށް ނިންމާފައިވާ ކަމުގައި ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުންގެ ތަރުޖަމާނު އަޙްމަދު ޝިފާން ވިދާޅުވީ، މަރުވެފައި އޮއްވައި ފެނުނު މީހާގެ ހަށިގަނޑުގެ ޕޯސްޓްމޯޓަމް ހެދުމަށް ނިންމާފައި ވަނީ ފުލުހުންގެ ތަޙްޤީޤަށް ބޭނުންވާތީ ކަމަށެވެ. އަދި މަރުވެފައި އޮއްވައި ފެނިފައިވާ މީހާއަކީ، އުމުރުުން 30 އަހަރުގެ ދިވެހި ފިރިހެނެއް ކަމުގައިވެސް ޝިފާން ވިދާޅުވިއެވެ.

އެމީހާ މަރުވެފައި އޮއްވައި ފެނިފައި ވަނީ، މަރުވެފައި އޮންނަތާ ކިތައް ދުވަސްފަހުންތޯ އާއި އަދި އެމީހާއަކީ ބަނޑޭރިކޮށީގެ އެ ގޭގައި ކުރިން ދިރިއުޅުނު މީހުންނާއި އެއްވެސް ގުޅުމެއް އޮތް މީހެއްތޯ ސުވާލު ކުރުމުން ޝިފާން ވިދާޅުވީ، ތަޙްޤީޤު ހިނގަމުންދާ މައްސަލައަކަށްވާތީ މިވަގުތަށް އެސުވާލަށް ޖަވާބެއް ދެވެން ނެތްކަމަށެވެ.

މަރުވެފައި އޮތް އެމީހާ ފެނިފައި ވަނީ މިއަދު ހަވީރުގައެވެ. އެމީހާގެ ހަށިގަނޑު އެގޭގެ ތެރެއިން ފެނިފައިވަނީ ފުލުހުންނަށް ލިބުނު ރިޕޯޓަކާއި ގުޅިގެން ގޮސް އެގޭތެރެ ބެލި ބެލުމުން ކަމުގައި ފުލުހުން ވިދާޅުވެފައިވެއެވެ.

މަރުވެފައި އޮއްވައި ފެނުނު އެމީހާގެ ހަށިގަނޑު މިވަގުތު އޮތީ ގަލޮޅު ސަހަރާގެ މޯޗަރީގައެވެ.