1932 ވަނަ އަހަރު ދިވެހިރާއްޖޭގެ ރައްޔިތުންގެ މަޖިލިސް އުފެދުނު ފަހުން މިފާއިތުވެދިޔަ 92 އަހަރުގެ ތެރޭގައި އެންމެ ގިނަ މަސައްކަތްތައް ނިންމާފައި ވަނީ ރައްޔިތުންގެ މަޖިލީހުގެ 19 ވަނަ ދައުރުގައި ކަމުގައި ރައްޔިތުންގެ މަޖިލީހުގެ ރައީސް މުޙައްމަދު އަސްލަމް ވިދާޅުވެއްެޖެއެވެ.

މިއަދު އޮތް ރައްޔިތުންގެ މަޖިލީހުގެ 19 ވަނަ ދައުރުގެ ފަހު ޖަލްސާ ނިންމަވާލައްވަމުން، ރައްޔިތުންގެ މަޖިލީހުގެ ރައީސް މުހައްމަދު އަސްލަމް ވަނީ، 28 މެއި 2019ގައި ފެށުނު ރައްޔިތުންގެ މަޖިލީހުގެ 19 ވަނަ ދައުރުގެ މަސައްކަތްތަކުގެ ތަފާސް ހިސާބުތައް މަޖިލީހުގެ ތަޅުމުގައި އިއްވާފައެވެ. އަދި ރައްޔިތުންގެ މަޖިލީހުގެ ޙަޔާތުގައި އެންމެ ގިނަ މަސައްކަތްތައް ކުރެވުނު މަޖިލީހަކީ 19 ވަނަ މަޖިލިސްކަން އެމަނިކުފާނު ފާހަގަކުރެއްވިއެވެ.

ރައްޔިތުންގެ މަޖިލީހުގެ 19 ވަނަ ދައުރުގައި ހޭދަވި ވަގުތު:

- 530 ޖަލްސާ، 1461 ގަޑިއިރު

- 3784 ކޮމިޓީ ބައްދަލުވުން، 4430 ގަޑިއިރާއި 23 މިނިޓް

ރައްޔިތުންގެ މަޖިލީހުގެ 19 ވަނަ ދައުރުގައި ނިންމި މަސައްކަތްތައް:

- 171 ބިލް

- 73 ޤަރާރު

- 152 މައްސަލަ

- 108 ކުއްލި މައްސަލަ

- ރިޔާސަތުން ހުށައެޅުއްވި 104 މައްސަލަ

- މެމްބަރުން ހުށައެޅުއްވި 48 މައްލަ

- 153 ކޮމިޓީ ރިޕޯޓް

- ވަޒީރުންނާއި ކުރެވުނު 384 ސުވާލު

19 ވަނަ ރައްޔިތުންގެ މަޖިލީހުން ފާސްކުރި މުޙިއްމު ބައެއް ބިލްތައް:

1- ރިޔާސީ ކޮމިޝަން ތަކުގެ ބިލު

2- ދިވެހިރާއްޖޭގެ ޤާނޫނީ ފަންނުގެ ބިލު

3- ދިވެހިރާއްޖޭގެ ޘަޤާފީ ތަރިކައިގެ ބިލު

4- ދިވެހިރާއްޖޭގެ މަސްވެރިކަމުގެ ބިލު

5- ވިސިލްބްލޯ ކުރާ ފަރާތްތައް ރައްކާތެރި ކުރުމުގެ ބިލު

6- ކުޑަކުދިންގެ ޢަދުލުގެ ބިލު

7- ކުޑަކުދިންގެ ޙައްޤުތައް ރައްކާތެރި ކުރުމުގެ ބިލު

8- ދަނޑުވެރިކަމުގައި ބޭނުންކުރާ ޕެސްޓިސައިޑާއި ބެހޭ ބިލު

9- އާމުދަނީ ޓެކްސް ނެގުމުގެ ބިލު

10- ފެނާއި ނަރުދަމާގެ ބިލު

11- ވިޔަފާރީގެ ދާއިރާގައި ވާދަވެރިކަން އުފައްދައި ދެމެހެއްޓުމުގެ ބިލު

12- މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ޙިމާޔަތް ކުރުމުގެ ބިލު

13- ދިވެހިރާއްޖޭގެ ޗާޓެޑް އެކައުންޓެންޓުންގެ ބިލު

14- ތަޢުލީމީ ބިލު

15- ޔުޓިލިޓީ ރެގިއުލޭޓަރީ އޮތޯރިޓީގެ ބިލު

16- އިންތިޤާލީ އިންޞާފުގެ ބިލު

17- ދިވެހި ފުލުހުންގެ ޚިދުމަތުގެ ބިލު

18- ދިވެހިރާއްޖޭގެ ތަފާސް ހިސާބުގެ ބިލު 

19- ދިވެހިރާއްޖޭގެ ހަކަތައިގެ ބިލު

20- ދިވެހިރާއްޖޭގެ ފޮރިން ސަރވިސްގެ ބިލު

21- ދިރިއުޅުމަށްޓަކައި ގޯތި ގެދޮރު ކުއްޔަށްދިނުމާއި ބެހޭ ބިލު

22- މަދަނީ އިޖުރާޢަތުގެ ބިލު

23- އެއްމެދު ޢިމާރާތުގެ ބިލު 

24- އިލެކްޓްރޯނިކް މުއާމަލާތްތަކާއި ބެހޭ ބިލު

25- ޖަމިއްޔާތަކުގެ ބިލު

26- ނެތިދިޔުމުުގެ ބިރު ހީވެފައިވާ ދިރޭތަކެތި ބައިނަލްއަޤުވާމީ ވިޔަފާރިކުރުމުގެ ބިލު

27- ފަންނީ އުފެއްދުން ގިންތި ކުރުމާއި ދަރަޖަކުރުމުގެ ބިލު

28- ކެމިކަލް ހަތިޔާރު މަނާކުރުމުގެ ބިލު

29- އުފަންވުމާއި މަރުވުން ރަޖިސްޓްރީ ކުރުމާއި އުފަންދުވަހުގެ ސެޓްފިކެޓް އަދި ދިވެހިރައްޔިތެއްކަން އަންގައިދޭ ކާޑު ހެދުމާއި ބެހޭ ބިލު

30- ކުނި މެނޭޖު ކުރުމުގެ ބިލު 

31- ކުންފުނީގެ ބިލު

32- އިންޑަސްޓްރިއަލް ރިލޭންސްއާ ބެހޭ ބިލު

33- މަސައްކަތުގެ މާހައުލުގެ ސަލާމަތާއި، ސިއްޙީ ރައްކާތެރިކަމާއި ބެހޭ ބިލު

34- ކާބޯތަކެތީގެ ރައްކާތެރިކަމުގެ ބިލު 

މީގެ އިތުރުން މުހިއްމު ބައެއް ޤާނޫނުތަކަށް އިސްލާޙް ކުރުމަށް ހުށައެޅުނު ބިލްތައްވެސްވެސް ހިމެނެއެވެ. އަދި އެކި އެކި ކަންކަމާއި ގުޅޭ ގޮތުން، މެމްބަރުން ހުށައެޅުއްވި މުހިއްމު ޤަރާރުތަކެއް ފާސްކުރެވިގެން ދިޔަކަންވެސް މަޖިލީހުގެ ރައީސް މުޙައްމަދު އަސްލަމް ފާހަގަކުރެއްވިއެވެ.

19 ވަނަ ރައްޔިތުންގެ މަޖިލީހުގެ ދައުރުގައި، މަޖިލީހުގެ ތަޅުމުގައި 3 ޤައުމެއްގެ އިސްވެރިން ތަޤުރީރު ކުރައްވާފައިވެއެވެ. އޭގެ ތެރޭގައި ހިމެނެނީ އިންޑިއާގެ ބޮޑުވަޒީރު، ނަރެންދުރަ މޯދީ އާއި، ސްރީލަންކާގެ ބޮޑުވަޒީރު ރަނިލް ވިކްރަމަ ސިންގހަ އާއި، ބަނގުލަދޭޝްގެ ބޮޑުވަޒީރު ޝައިޚް ޙަސީނާއެވެ.

މީގެ އިތުރުން ކޮމަންވެލްތާއި އަލުން ގުޅި، ކޮމަންވެލްތު ޕާލަމަންޓްރީ އެސޯސިއޭޝަންގައި ރާއްޖެއިން ބައިވެރިވެފައި ވަނީ 4 ފެބުރުއަރީ 2020ގައި ރައްޔިތުންގެ މަޖިލީހުން ފާސްކޮށްގެންނެވެ.

19 ވަނަ ރައްޔިތުންގެ މަޖިލީހަށް 87 މެމްބަރުން އިންތިޚާބު ކުރެވުނު ނަމަވެސް 13 މެއި 2024ގައި ރައްޔިތުންގެ މަޖިލީހުގެ މެމްބަރުންގެ ގޮތުގައި ތިއްބެވީ 80 މެމްބަރުންނެވެ.