ހައުސިން ޑިވެލޮޕްމަންޓް ކޯޕަރޭޝަން އެޗްޑީސީގެ އެސްޓޭޓް އޮފިސަރެއްގެ މަގާމުގައި ކުރިން ހުރި މީހަކު، ހުޅުމާލޭން ބިމެއް ވިއްކާނެ ކަމަށް ބުނެ އޮޅުވާލައިގެން މީހަކު އަތުން ފައިސާ ނެގި މައްސަލައިގައި ދައުވާ ކުރުމަށް ޕްރޮސެކިއުޓާ ޖެނެރަލް (ޕީޖީ)ގެ އޮފީހަށް ފޮނުވައިފި އެވެ.

2022 ގައި ހިނގާފައިވާ މި ހާދިސާގައި 2،600 އަކަފޫޓުގެ ބިމެއް ވިއްކާނެކަމަށް ބުނެ، ސައްޙަ ނޫން ސްލިޕުތަކެއް އެޗްޑީސީގެ ނަމުގައި ހަދައިގެން މީހެއްގެ އަތުން 550،000ރ. ނެގިކަމަށް ތަޙުޤީޤަށް އެނގިފައިވާކަމަށް އޭސީސީން ވަނީ ހާމަކޮށްފައެވެ.

މިކަމުގައި އޭނާގެ މައްޗަށް ކުރަނީ ރަސްމީ ހައިސިއްޔަތު ނަހަމަގޮތުގައި ބޭނުންކޮށްގެން ނާޖާއިޒް މަންފާ ހޯދުމުގެ ކުށުގެ ދައުވާ އެވެ. އަދި ބިން ވިއްކާނެ ކަމަށް ބުނެ އޭނާ ހޯދާފައިވާ ފަސް ލައްކައަށްވުރެ ގިނަ ރުފިޔާ، އެ ދައުވާގެ ތެރެއިން ހޯދަން އެދިފައިވާނެ ކަމަށް އޭސީސީއިން ބުންޏެވެ.