ބީއެމްއެލްގެ ޕީއޯއެސް ނެޓްވޯކްގައި ޕޭމަންޓް މެތަޑެއްގެ ގޮތުގައި ވީޗެޓް ޕޭމެންޓް މިހާރު ބޭނުން ކުރެވޭނެ ކަމުގައި އެ ބޭންކުން ބުނެފިއެވެ.

ބީއެމްއެލްއިން ބުނެފައި ވަނީ، މިގޮތަށް ހަމަޖެއްސުމާއި އެކު ވީޗެޓް ޕޭމެންޓް ކިއުއާރް ކޯޑު ބޭނުންކޮށްގެން ބީއެމްއެލްގެ ކާޑު މެޝިންތަކުން ފައިސާ ދެއްކޭނެ ކަމަށެވެ،

ޗައިނާގެ ވީޗެޓް ޕޭމަންޓަކީ، އެއްބިިލިއަން މީހުން ބޭނުން ކުރާ ޚިދުމަތެކެވެ. މިހާތަނަށް ވީޗެޓް ޕޭއިން ފައިސާގެ މުއާމަލާތްތައް ކުރެވެނީ ހަމައެކަނި ބީއެމްއެލް ޕޭމަންޓް ގޭޓްވޭ މެދުވެރިކޮށް އެކަންޏެވެ.

ބީއެމްއެލްއިން މިޚިދުމަތް ފެށުމާއި އެކު، އިކޮނޮމިކް މިނިސްޓަރ މުޙައްމަދު ސަޢީދު ވަނީ އެކަމަށް މަރުހަބާ ވިދާޅުވެފައެވެ. 

ބޭންކް އޮފް މޯލްޑިވްސްއިން ބުނީ އެބޭންކަކީ، ރާއްޖޭގައި މަރޗަންޓް ޕޭމަންޓް ސޮލިއުޝަން އެންމެ ފުޅާދާއިރާއެއްގައި ފޯރުކޮށްދޭ އަދި އެކި ވިޔަފާރި ސެގްމެންޓްތަކާއި ކަސްޓަމަރުން ބޭނުންވާ ގިނަ ޕްރޮޑަކްޓްތަކާއި ހިދުމަތްތައް ފޯރުކޮށްދޭ ބޭންކް ކަމަށެވެ.

މިގޮތުން، އެމެރިކަން އެކްސްޕްރެސް، ވިސާ، މާސްޓަރކާޑް، ޔޫނިއަން ޕޭ ފަދަ ދުނިޔޭގެ ބޮޑެތި ކުންފުނިތަކުން ދޫކުރާ ޑެބިޓް އަދި ކްރެޑިޓް ކާޑުތަކުގެ އިތުރުން ބީއެމްއެލް ޕޭ، އަލީ ޕޭ، އެޕަލް ޕޭ، އަދި ގޫގުލް ޕޭ ފަދަ ޑިޖިޓަލް ވޮލެޓް މެދުވެރިކޮށް ފައިސާ ބަލައިގަނޭވޭ ހިދުމަތް އެ ބޭންކުން ދަނީ ފޯރުކޮށްދެމުންނެވެ. ޕީއޯއެސް ޓަރމިނަލްގެ އިތުރުން ބޭންކުގެ މަރޗަންޓް ޕޯޓަލް އަދި އެމްޕޮސް އެޕް މެދުވެރިކޮށް މަރޗަންޓުންނަށް އޮންލައިންކޮށް ކޮންމެ ތަނެއްގައި ހުރެގެންވެސް ފައިސާ ބަލައިގަނެވޭނެ ކަމަށާއި އަދި މި ހިދުމަތް ބޭނުންކޮށްގެން ޕޭމަންޓް ރިކުއެސްޓް ފޮނުވާ، ފައިސާގެ މުއާމަލާތް ޗެކްކުރުމާއި އޮންލައިން ސްޓޯރތައް މެނޭޖްކުރެވޭނެ ކަމުގައިވެސް ބީއެމްއެލްއިން ބުނެފައިވެއެވެ.