މިފެށޭ ދިރާސީ އަހަރުންފެށިގެން ކުރިޔަށް އޮތް ދެ އަހަރުގެ ތެރޭގައި ރާއްޖޭގައި ހުރި ހުރިހާ ސަރުކާރު ސްކޫލުތަކެއް އޭސީ ކުރަން ނިންމާފައިވާ ކަމުގައި އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢު ވިދާޅުވެއްޖެއެވެ.

މިނިސްޓަރ ޝަފީޢު މިހެން ވިދާޅުވީ، ޖަމާލުއްދީން ސްކޫލުގެ ކުލާސްރޫމުތަކުގައި ހޫނު ގަދަވާތީ، ބެލެނިވެރިންގެ އެހީތެރިކަމާއި އެކު ކުލާސްރޫމުތަކުގައި ފަންކާތައް އިތުރުކުރުމަށް އެސްކޫލުން ނިންމައި އެކަން އިއުލާނު ކުރުމާއި ގުޅިގެން އާއްމު ރައްޔިތުންގެ ފަރާތުން ސޯޝަލްމީޑިއާގައި އަމާޒުވި ފާޑުކިޔުންތަކަށް ފަހުގައެވެ.

މިސްޓަރ ޑރ ޝަފީއު ވިދާޅުވީ، ސަރުކާރުގެ ހުރިހާ ސްކޫލުތަކެއް އޭސީ ކުރުމުގެ މަސައްކަތް ކުރިޔަށް ގެންދިޔުމަށް ހަމަޖެހިފައިވަނީ، ރައީސުލްޖުމްހޫރިއްޔާގެ ލަފާފުޅާއި އަދި ކޮމިއުނިޓީގެ އެހީތެރިކަމާއި އެކުގައި ކަމަށެވެ. މިގޮތުން އެމަސައްކަތް މި މެއި މަހުގެ ފަހު ހަފްތާގައި އިފްތިތާޙް ކުރައްވާނެ ކަމުގައިވެސް މިނިސްޓަރ ޑރ. ޢިސްމާޢީލް ޝަފީޢު ވިދާޅުވިއެވެ. ދިރާސީ އައު އަހަރުގެ ކިޔެވުން މި މެއި މަހުގެ ފަހު ހަފްތާގައި ފެށޭނެއެވެ.

މިނިސްޓަރ ޝަފީޢު ވިދާޅުވީ،  މިފެށޭ ދިރާސީ އަހަރު ތައުލީމީ ނިޒާމަށް ހެޔޮ ބަދަލުތަކެއް އަންނާނެ ގިނަ ޕްރޮޖެކްޓުތަކެއްވަނީ ރޭވިފައި ކަމަށެވެ. މިގޮތުން، މުދައްރިސުން ތަމްރީނު ކުރުމުގެ ގައުމީ ޕްރޮގްރާމެއް ފައްޓަވާނެ ކަމަށާއި، އެ ޕްރޮގްރާމާއެކު މުދައްރިސުންނަކީ ޤަދަރުވެރި ބައެއްކަމުގައި ހެދުމުގެ އަމަލީ މަސައްކަތް ފެށި، އަދި ސްކޫލްތަކުގައި މުދައްރިސުން ހޭދަކުރާ ވަގުތު މަދުކުރުމަށް އެކަށީގެންވާ ފިޔަވަޅުތަކެއްވެސް އެޅިގެންދާނެ ކަމުގައި މިނިސްޓަރ ޝަފީޢު ވަނީ ވިދާޅުވެފައެވެ.