މަކަރާއި ހީލަތުން މީހުންގެ އަތުން ފައިސާ ހޯދާކަމުގެ ތުހުމަތު ކުރެވޭ ފުލުހެއްގެ މައްސަލަ, ދިވެހި ފުލުހުންގެ ޚިދުމަތުގެ ޕްރޮފެޝަނަލް ސްޓެންޑަރޑްސް ކޮމާންޑް އިން ތަޙްގީގުކުރަމުންދާ ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންގެ ތަރުޖަމާނު އަޙްމަދު ޝިފާން ވިދާޅުވީ، ފުލުހުންގެ އޮފިސަރަކާއި މެދު ސޯޝަލް މީޑިއާގައި ތުހުމަތުކޮށް ދައުރުކުރަމުންދާ ޕޯސްޓެއް، ދިވެހި ފުލުހުންގެ ޚިދުމަތުގެ ސަމާލުކަމަށް އައިސްފައިވާ ކަމަށާއި އަދި އެ ފުލުސް މީހާގެ މައްސަލަ ތަޙްޤީޤު ކުރަމުންދާ ކަމަށެވެ. 

ސޯޝަލް މީޑިއާގައި މީހަކު ވަނީ، ފުލުހެއްގެ ފޮޓޯ އާއި ވަނަވަރު ޙިއްޞާކޮށް އެފުލުސް މީހާއަކީ، ރާއްޖެއަށް ކާރު ގަނެދޭނެ ކަމަށް ބުނެ، މީހުންގެ އަތުން ފައިސާ ނަގަމުން ގެންދާ މީހެއް ކަމަށެވެ. އަދި އޭނާގެ މައްސަލަ ފުލުހަށް ހުށައަޅައިގެން ނުބެލޭ ކަމަށްވެސް ސޯޝަލް މީޑިއާގައި އެމީހާ ބުނެފައި ވެއެވެ.

މަކަރާއި ހީލަތުން މީހުންގެ އަތުން އެކި ގޮތް ގޮތުން ފައިސާ ހޯދުމުގެ މައްސަލަތައް އިތުރުވެފައިވާ އިރު އެފަދަ މައްސަލަތަކުގައި ފުލުހުން ޝާމިލްވާކަމަށް ބުނެ އާއްމު ރައްޔިތުން މީގެ ކުރިންވެސް ސޯޝަލް މީޑިއާގައި ކަންބޮޑުވުންތައް ފާޅުކޮށްފައިވެއެވެ. އަދި އެފަދަ ކަންކަމަށް އާއްމުން ސަމާލުވުމަށްވެސް ފުލުހުންގެ އިދާރާއިން ތަކުރާރުކޮށް އިލްތިމާސް ކުރަމުން ގެންދެއެވެ.