ދިވެހި ސަރުކާރުން ސްޓޭޓް ބޭންކް އޮފް އިންޑިއާއަށް މިއަހަރު ދައްކަންޖެހޭ 50 މިލިއަން ޑޮލަރު ދެއްކުން، ދިވެހި ސަރުކާރުން އެކަމަށް އެދިގެން އެއް އަހަރުގެ މުއްދަތަށް ފަސްކޮށްދީފައިވާ ކަމުގައި، އިންޑިއާ ސަރުކާރުން ހާމަކޮށްފިއެވެ.

އިންޑިއާގެ އެކްސްޓަރނަލް އެފެއާޒް މިނިސްޓްރީންނާއި، ދިވެހި ޚާރިޖިއްޔާއިންވެސް ވަނީ އެކަން ހާމަކޮށްފައެވެ.

ދިވެހި ސަރުކާރުން އިންޑިއާގެ ބޭންކް، ސްޓޭޓް ބޭންކް އޮފް އިންޑިއާއަށް ދައްކަން ޖެހޭ 50 މިލިއަން ޑޮލަރަކީ، އެބޭންކުން ގަނެފައިވާ ދިވެހިރާއްޖޭގެ ޓްރެޝަރީ ބޮންޑަށް މިއަހަރު ދައްކަން ޖެހޭ ފައިސާއެވެ. އެސްްބީއައި އިން ވަނީ، ޖުމުލަ 200 މިލިއަން ޑޮލަރުގެ ޓްރެޝަރީ ބޮންޑް ގަނެފައެވެ. އެއީ ދިވެހި ސަރުކާރާއި އިންޑިއާ ސަރުކާރާއި ދެމެދު 2019 ވަނަ އަހަރު ވެވުނު އެއްބަސްވުމުގެ ދަށުން ވިއްކާފައިވާ ޓްރެޝަރީ ބޮންޑަށް، ދިވެހި ސަރުކާރުން ދައްކަންޖެހޭ ފައިސާއެވެ.

ދިވެހި ޚާރިޖިއްޔާއިން ވަނީ، ބަޖެޓް ސަޕޯޓްގެ ގޮތުގައި އިންޑިއާ ސަރުކާރުން ރާއްޖެއަށް ދެމުން ގެންދާ ދީލަތި އެހީތައް ފާހަގަކޮށް އެކަމަށް ޝުކުރު އަދާކޮށްފައެވެ. އަދި އިންޑިއާ ސަރުކާރުގެ ހިލޭ އެހީގައި ރާއްޖޭގެ އުމްރާނީ ތަރައްގީގެ ގިނަ މަޝްރޫއުތަކާއި މުޖުތަމައަށް ފައިދާ ހުރި ތަރައްޤީގެ މަޝްރޫޢުތައް ހިންގެމުން ދާއިރު އެކަންވެސް ޚާރިޖިއްޔާގެ ބަޔާނުގައި ފާހަގަކޮށްފައި ވެއެވެ.

ޚާރިޖިއްޔާއިން ހާމަކޮށްފައިވާ ގޮތުގައި ސްޓޭޓް ބޭންކް އޮފް އިންޑިއާއަށް ދިވެހިރާއްޖެއިން ދައްކަންޖެހޭ 50 މިލިއަން ޑޮލަރު ދެއްކުން ފަސްކޮށްދީފައި ވަނީ، ދާދިފަހުން ފޮރިން މިނިސްޓަރ މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅުގައި، ދެޤައުމުގެ ޚާރިޖީ ވަޒީރުންގެ މެދުގައި އެކަމާއި ގުޅޭ ގޮތުން ކުރެވުނު މަޝްވަރާތަކަށް ފަހުގައެވެ.