އިންގްލިޝް ޕްރިމިއަ ލީގުގައި އާދީއްތަ ދުވަހުގެރޭ މެންޗެސްޓަރ ޔުނައިޓެޑާއި އާސެނަލް ބައްދަލުކުރި މެޗު 1-0 އިން ކާމިޔާބުކޮށް، ލީގު ރޭހުގެ އެއްވަނައަށް އަނެއްކާ ވެސް އާސެނަލް ޖެހިލައިފިއެވެ.

އޯލްޑް ޓްރެފާޑުގައި އާސެނަލް އިން ޔުނައިޓެޑު ބަލިކުރިއިރު، މި މެޗުގެ ހަމައެކަނި ގޯލު އާސެނަލްއަށް ކާމިޔާބުކޮށްދިނީ ޓްރޮސާޑްއެވެ. އަދި މި ނަތީޖާއާއެކު، ޔުނައިޓެޑުން މި ސީޒަނުގައި ބަލިވި މެޗުތަކުގެ އަދަދު މިވަނީ 9 އަށް އަރާފައެވެ. އެހެންކަމުން މިއީ އެ ކުލަބުގެ ތާރީހުގައި އެއް ސީޒަނެއްގައި އެންމެ ގިނައިން ބަލިވެފައިވާ ސީޒަންވެސް މެއެވެ.

ޔުނައިޓެޑު ބަލިކުރުމުން ލިބުނު 3 ޕޮއިންޓާއެކު، އާސެނަލް 86 ޕޮއިންޓާއެކު ލީގުގެ އެއްވަނައިގައި އޮތްއިރު، 85 ޕޮއިންޓާއެކު ލީގުގެ ދެވަނައިގައި އޮތީ މެންޗެސްޓަރ ސިޓީއެވެ. އެހެންކަމުން އަމިއްލަ ބާރު އޮތީ ސިޓީގެ އަތުގައެވެ. ލީގުގައި ބާކީ ދެ މެޗު ސިޓީ ކުޅެން ޖެހޭއިރު، އާސެނަލްއަށް ބާކީ އޮތީ އެންމެ މެޗެކެވެ.