ޤަވާއިދާއި ޚިލާފަށް ރާއްޖޭގައި އުޅޭ ބިދޭސީންނަށް މިސަރުކާރުން ދިއްކޮށްލަނީ ޒައިތޫނި ފަތްކޯޅިއެއް، ނުވަތަ ޞުލްޙަިއގެ އަތެއް ކަމުގައި މިނިސްޓަރ އޮފް ސްޓޭޓް ފޮރ ހޯމް ލޭންޑް ސެކިއުރިޓީ އެންޑް ޓެކްނޯލޮޖީ، އަޙްމަދު ސިއްދީޤު ވިދާޅުވެއްޖެއެވެ.

އޭނާ މިހެން ވިދާޅުވީ، ހޯމް މިނިސްޓްރީގެ ދަށުން ހިންގާ މުއްސަސާތަކުގެ މަސައްކަތްތަކާއި ގުޅޭ ގޮތުން މީޑިއާތަކަށް މައުލޫމާތު ދިނުމަށް މިއަދު ފުލުހުންގެ އިސްކަންދަރުކޮށީގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. 

ޤަވާއިދާއި ޚިލާފަށް އުޅޭ ބިދޭސީންގެ ބަޔޮމެޓްރިކް ޑާޓާ އެއްކުރުމަށް މިހާރު، ހޯމް މިނިސްޓްރީން ކުރިޔަށްގެންދާ އޮޕަރޭޝަން "ކުރަނގި" އާއި ގުޅޭ ގޮތުން ސްޓޭޓް މިނިސްޓަރ ސިއްދީޤު ވިދާޅުވީ، އެޕްރޮގްރާމްގެ ތެރޭގައި އެއްވެސް މީހަކު ހިފައި ހައްޔަރު ކުރުމެއް ނޯންނާނެ ކަމަށެވެ.

ސިއްދީޤު ވިދާޅުވީ، ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންނަކީ ނުވަތަ ލޭބަރުންނަކީ އަންޑޮކިއުމެންޓެޑް ބައެއް ކަމުގައި ބެލެވެން ނޯންނާނެ ކަމަށާއި އެއީ ޤަވާއިދާއި ޚިލާފަށް އުޅޭ ބައެއް ކަމަށެވެ. އަދި ޤަވާއިދާއި ޚިލާފަށް އުޅޭ މީހުންނަށް މި ޕްރޮގްރާމްގެ ތެރެއިން ރެގިއުލަރައިޒް ވުމުގެ ފުރުޞަތު ލިބިގެންދާނެ ކަމުގައިވެސް ސިއްދީޤު ވިދާޅުވިއެވެ. އަދި އެފުރުޞަތުގެ ބޭނުން ނުހިފާ ފަރާތްތައް ރާއްޖެއިން ފޮނުވާ ލެވޭނެ ކަމުގައިވެސް ސިއްދީޤު ވިދާޅުވިއެވެ.

ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަަލަ އަކީ ބޮޑު މައްސަލައެއް ނަމަވެސް އެމައްސަލައަށް ހައްލެއް ނުލިބި ދުވަހުން ދުވަހަށް މައްސަލަ ދަނީ ގޯސްވަމުންނެވެ. އަދި ބިދޭސީންގެ ސަބަބުން ރާއްޖޭގެ ޤައުމީ ސަލާމަތަށް ނުރައްކާވާނެ ހާލަތެއް ކުރިމަތިވަމުން އަންނަ ކަމުގެ އިންޒާރުތައްވެސް އެކަމާއި ގުޅޭ ތަޖުރިބާކާރުން ގެންދަނީ ދެއްވަމުންނެވެ. ފާއިތުވި އަހަރުތަކުގައި ރާއްޖޭގައި ބިދޭސީން ހިންގަމުން އަންނަ ކުށުގެ އަމަލުތައް އަންނަނީ އިތުރުވެ ގިނަ ވަމުންނެވެ.